Rueda sobre o caso Villares: "Non vou declarar como culpable a quen a Xustiza non declarou como culpable"

A dimisión do ex conselleiro do Mar, Luis Villares, tras ser acusado de agresión sexual, continúa no centro da vida política galega. Cinco días despois, o presidente da Xunta insiste en defender a inocencia de Villares e, a pesar de ser preguntado pola inocencia da denunciante e presunta vítima da agresión sexual, Paloma Lago, Alfonso Rueda evita pronunciarse.  "Nun estado de dereito non vou a tratar como culpable a quen a xustiza non contempla aínda como culpable", mantivo.

"Eu confío moito na xustiza e a todos os actores. Creo que as opinións dos que traballan na xustiza tamén teñen que quedar na xustiza e os da politica, na política", respondeu ao ser preguntado polas declaracións da fiscal de sala xefa da sección penal do Tribunal Supremo, Teresa Peramato, que dixo que, neste contexto, o que hai que facer é "abrazar ás vítimas, darlles credibilidade e non cuestionalas desde o primeiro momento".

"Eu creo moito na xustiza e que actúe a xustiza. No momento no que entrou o procedemento en fase xudicial, Villares renunciou ao seu cargo e perdeu o aforamento e a partir de agora actuará a xustiza ordinaria", dixo. "Este é o xeito de actuar e o que pon nervioso á oposición... Creo na xustiza e no estado do dereito. Non vou declarar como culpable a quen a xustiza non declarou como cuilpable", engadiu.

CULPABILIDADES DIFERENTES

Con todo, diferenciou a presunción de inocencia de Villares coa do fiscal xeral do Estado, Álvaro Ortíz. Neste sentido, rexeitou o "paralelismo", xa que Villares dimitiu ao ser investigado e "o fiscal acaba de ser enviado a xuízo", polo que entende "que a situación non ten nada que ver". "A decisión que se toma --na Xunta-- é moitísimo antes de chegar a isto", incidiu. "Gustaríame que o PSOE tivese as cousas tan claras co que estamos a ver, pero todo o contrario", comparou.

Rueda isistiu varias veces en que Villares é un "compañeiro" --de feito é amigo persoal do presidente-- e que confía na xustiza e na súa probable inocencia. "Eu creo firmemente que as persoas son culpables cando a xustiza dictamina iso e un estado de dereito se basea niso. E non me parece lóxico que se faga o parelelismo co fiscal xeral. As situacións non teñen que ver", suliñou.

 

COMUNICACIÓN A FEIJÓO

 

Sobre se comunicou a situación a Feijóo antes da pasada semana, xa que el mesmo confirmou que el era coñecedor desta situación desde febreiro, o presidente galego suliñou que "cumpriu co que din os estatutos do PP". "Comuniqueillo cando houbo un pronunciamento xudicial", dixo. Este marco temporal sitúa a comunicación entre o líder do PP galego e o xefe de filas dos populares estatais entre o martes da semana pasada (cando, segundo trasladouse, o Tribunal Superior de Xustiza de Galicia --TSXG-- ratifica a Villares a súa condición de investigado) e o mércores, cando Villares, que tamén pediu a baixa temporal do partido, renuncia.

En canto a se Feijóo validou o proceder e a dimisión, Rueda, quen coñecía desde febreiro a existencia da denuncia, defendeu o momento no que se dá o paso (cando hai unha notificación formal do TSXG de que se van a abrir dilixencias contra Villares como investigado) e cinguiu a el mesmo e a Villares o paso dado. "Creo que estabamos de acordo, tanto o señor Villares como eu mesmo en que era a decisión adecuada. Así se tomou, eu tíñao claro e el tamén", esgrimiu.

CRÍTICAS FEMINISTAS

Por outra banda, a asociación galega de mulleres do mar, Mulleres Salgadas, censurou este luns a "posta en escena" da dimisión de Alfonso Villares como conselleiro do Mar, por reforzar "mandatos heteropatriarcais", así como o "abrazo e apoio" que lle trasladou Alfonso Rueda, e advertiu de que, contrariamente ao trasladado polo exconselleiro ao anunciar a súa marcha, a violencia machista é un "asunto público" e non persoal.

A través dun comunicado, e tras manifestar o seu respecto pola presunción de inocencia, Mulleres Salgadas quixo enviar unha mensaxe de apoio á denunciante, Paloma Lago, e lamentou a "revictimización" que sofre ao filtrarse o seu nome á esfera pública. "Esiximos responsabilidades sobre este feito, que nos parece gravísimo tanto para ela como para todas as mulleres que sufriron, sofren ou poden sufrir violencia machista".