Aberto expediente por posibles "prácticas anticompetitivas" en contratos de bus escolar da Xunta

A Comisión Galega da Competencia (CGC) incoou expediente sancionador por posibles "prácticas anticompetitivas" na contratación pública da Xunta de rutas de bus escolar. Así figura nun anuncio con data do 18 de xullo de 2025, que adianta Praza.gal este martes, no que se apunta a unha posible infracción da lei de defensa da competencia na contratación de unións temporais de empresas (UTE) para o transporte escolar.

Agora, establece un prazo máximo de 24 meses para a instrución do expediente, polo que se se detectan "prácticas prohibidas" tras a investigación, haberá proposta de sanción. Este expediente refírese ao lote 1A-2021-CHE, e segundo figura na Plataforma de Contratación do Sector Público correspóndese con rutas de transporte escolar a 424 centros de ensino público, mediante 57 lotes, cun orzamento de licitación de 93,4 millóns de euros.

En 2023, o Tribunal Superior de Xustiza de Galicia (TSXG), en senllos sentenza, anulou a adxudicación por parte da Xunta a dúas Unións Temporais de Empresas (UTE) dos lotes 51 e 45 do contrato de transporte escolar a centros públicos dependentes da Consellería de Educación porque estaban "dominadas" polo grupo Monbus, cuxa participación excedía do 90 % e do 60 %, respectivamente. Posteriormente, estes fallos foron revogados.

A sección terceira da Sala do Contencioso-administrativo do TSXG avalou que a Xunta non excedeu o número máximo permitido de lotes de transporte escolar adxudicados a Monbus. O pasado mes de xuño, conselleiro de Presidencia, Xustiza e Deportes, Diego Calvo, informou o Parlamento que o Goberno galego prevé licitar por máis de 90 millóns o servizo de transporte escolar, que pasará de 57 a 71 contratos. Entre outras novidades, asegurou que se limitarán os lotes a un mesmo adxudicatario e búscase "fomentar a concorrencia e a participación de empresas máis pequenas".

INFRACCIÓNS MOI GRAVES

As condutas consistentes en acordos entre competidores considéranse infraccións moi graves, o que pode dar lugar a multas que alcancen ata o 10 % do volume total de negocios mundial do infractor no exercicio anterior á sanción. Tamén pode dar lugar á prohibición para a contratación con administracións públicas. A Comisión Galega da Competencia dispón dun programa de clemencia que permite a empresas e directivos implicados en cárteles colaborar voluntariamente coa achega de información sobre estas prácticas para unha exención parcial ou total de sancións.