O 'aviveiramento', práctica que mantén fondeadas capturas de especies como a nécora ou a anguía, xa está regulado

A Consellería do Mar publicou a orde que regula o coñecido como 'aviveiramento', unha práctica consistente en manter vivas fondeadas no mar determinadas especies ata que son levadas a lonxa para a súa poxa. Así, poderán manterse nestas condicións durante un máximo de sete días consecutivos, aínda que este tope pode ampliarse baixo autorización "en épocas de maior valor comercial".

O Diario Oficial de Galicia (DOG) deste martes publica o texto no que se recolle que se trata de especies "cuxo valor á hora da súa comercialización depende de que se manteñan vivas", polo que non son desembarcadas e almacénanse no mar. En concreto, estas especies son: camarón, nécora, centolla, boi, bogavante, lagosta, santiaguiño e anguía. A Xunta recoñece que se trata de dar resposta a unha "vella reclamación" do sector ante "o baleiro" legal existente.

Mar aclara que para o desenvolvemento desta actividade o lugar no que se manteñen estas especies pode ser a propia borda da embarcación, unha aboia de fondeo ou lugares onde se efectúa a atracada permanente de barcos pesqueiros. Estes emprazamentos "necesitan estar debidamente identificados" para que as características básicas da embarcación que realiza o traslado sexan perfectamente visibles. O marisco estará nun colector ou unha gaiola fóra da embarcación onde as capturas se manteñan vivas ata o desembarque.

Así mesmo, créanse dous documentos para a "rastrexabilidade" denominados: declaración de traslado e rexistro de finalización de declaración de traslado. Só se poderá expedir unha declaración de traslado por día e embarcación. O número máximo de declaracións será de cinco. A marxe autorizada de cantidades na declaración de traslado será do 10 % ou do 20 % cando a cantidade non supere os 100 quilos en equivalente de peso vivo.

Centolas á venda nun posto da Praza de Abastos, a 7 de novembro de 2024, en Portonovo, Sanxenxo | Fonte: Elena Fernández - Arquivo