A Xunta terá que pagar 44.713 euros a un interino cesado por non superar as probas de estabilización
O TSXG confirma a sentenza, pioneira en Galicia.
Por Europa Press / Redacción | SANTIAGO DE COMPOSTELA | 04/09/2025 | Actualizada ás 13:33
A sección primeira da Sala do Contencioso-administrativo do Tribunal Superior de Xustiza de Galicia (TSXG) ratificou unha sentenza do maxistrado do Xulgado do Contencioso-administrativo número 1 de Pontevedra, pioneira en Galicia. Na mesma, condenou á Xunta a pagar unha compensación económica de 44.713 euros a un docente polo seu cesamento como persoal interino, posto que desempeñou durante 30 anos, tras non superar as probas dun procedemento de estabilización convocado pola Administración autonómica.
O alto tribunal galego, segundo informa, desestimou o recurso de apelación interposto pola Consellería de Cultura, Educación, Formación Profesional e Universidades contra a sentenza de primeira instancia, ditada en outubro de 2024, a cal confirmou. Expón que na resolución, os maxistrados destacan que a compensación económica prevese no artigo 2.6 da lei 20/2021, de medidas urxentes para a redución da temporalidade no emprego público, cuxo obxectivo "é tanto pór fin á excesiva temporalidade nas administracións como dar unha resposta legal á compensación económica polo abuso na temporalidade da mesma, aplicando a cláusula 5ª da Directiva 1999/70/CE do Consello"
Dita lei, segundo consta na resolución, recoñécelle ao docente o dereito a percibir a compensación que reclama, equivalente ás retribucións fixas de 20 días por ano de servizo, ata un máximo de 12 mensualidades. "A Xunta fixo coincidir a efectividade da adxudicación de destino a quen superaron o proceso de estabilización co comezo do curso académico 2023/2024, e á vez co fin do nomeamento como funcionario interino do actor", destaca a Sala na sentenza.
Engade que, con iso, "xerouse a aparencia de que o motivo do cesamento do actor foi o fin do nomeamento como funcionario interino cando, en realidade, foi a non superación do proceso selectivo de estabilización ao que se presentou". Así, destaca que, en efecto, as dúas prazas vacantes da súa especialidade foron convocadas no proceso de estabilización, as cales foron adxudicadas aos aspirantes que o superaron.
ADVERTENCIA
O TSXG subliña que "se bastase con que a administración educativa advertise desde o inicio do curso escolar da data de finalización da interinidade ao termo dese curso, desaparecería gran parte do efecto útil do artigo 2.6 da Lei 20/2021 porque, dese modo, pecharía a posibilidade de percepción da indemnización simplemente con realizar aquela advertencia, aínda que o funcionario interino se presentara ao proceso de estabilización, non o superase e por iso vise finalizada a súa relación coa administración".
A sección primeira da Sala do Contencioso-administrativo conclúe que o demandante "viu finalizada a súa vinculación coa administración pola non superación do proceso selectivo, pois, de feito, quedou en situación de desemprego todo o curso escolar 2023-2024".
