O suicidio, un problema complexo que require implicación de toda a sociedade
Gómez Caamaño subliña a necesidade de formación, sensibilización e coordinación entre educación, sanidade e medios de comunicación.
Por Europa Press / Redacción | Santiago de Compostela | 10/09/2025 | Actualizada ás 18:07
O conselleiro de Sanidade, Antonio Gómez Caamaño, anunciou este mércores que o 'Proxecto YAM', de prevención da conduta suicida en mozas, chegará este curso a 172 centros educativos e ao dobre de alumnado que o ano pasado, ata alcanzar os 10.000.
Gómez Caamaño reivindicou as políticas da Xunta para mellorar a saúde mental da poboación, entre elas o plan específico de prevención do suicidio posto en marcha en 2017. Ademais, actualmente o seu departamento traballa no plan de saúde mental 2025-2030.
Máis en concreto, destacou que Galicia conta cunha rede de sete unidades de prevención intensiva de conduta suicida --unha por área-- que atende nun máximo de 72 horas e que está a pór en marcha os hospitais de día de saúde mental infanto-xuvenil.
Ademais, a preguntas dos medios, confirmou que a final de ano estarán incorporados os 14 psicólogos clínicos prometidos para a atención primaria do Sergas, mentres que de face a 2030 a rede destes profesionais alcanzará os 50.
O conselleiro referiuse ao suicidio como "un problema crecente" que é "complexo" e "multifactorial", polo que require de "múltiples solucións" e de "a implicación de todos os axentes" da sociedade.
Pero iso require "moita formación" e "sensibilización", motivo polo cal a Xunta desenvolve diversas campañas e protocolos non só nos ámbitos puramente sanitarios e educativos, senón tamén noutros como o xornalismo. De feito, está a elaborarse de forma conxunta co Colexio de Xornalistas unha guía de boas prácticas para informar sobre suicidios.
