As populares Nava Castro e Sandra Bastos renuncian ao seu cargo de deputadas provinciais en Pontevedra
Trátase de algo que xa estaba previsto nas filas do Partido Popular para cando se cumprise a metade do mandato, segundo explicou o propio presidente da Deputación de Pontevedra, Luís López.
Por Europa Press / Redacción | PONTEVEDRA | 12/09/2025 | Actualizada ás 15:47
A Deputación de Pontevedra celebrou este venres o pleno que tería que oficiarse o pasado mes de agosto pero que habitualmente se traslada a setembro para o goce das vacacións, de aí o carácter extraordinario da convocatoria de hoxe. Entre a orde do día atópase a renuncia ás súas actas de deputadas provinciais por parte de Nava Castro e Sandra Bastos, do grupo provincial do Partido Popular. Trátase de algo que xa estaba previsto nas filas do Partido Popular para cando se cumprise a metade do mandato, segundo explicou o propio presidente da Deputación de Pontevedra, Luís López, "non como outros que houbo nestes dous anos", apuntou en referencia ás saídas da Corporación por parte de José Campos, Marta Fernández-Tapias ou Isabel Couselo.
Ata agora Nava Castro era a responsable da área de Turismo e Sandra Bastos o era de Igualdade, Príncipe Felipe e Benestar Social. Luís López lembrou que en maio de 2023 xa anunciaran que en dous partidos xudiciais ía haber unha "rotación". É o caso de Vigo, a redondelana Sandra Bastos será substituída pola concelleira de Gondomar, Paula Bouzos e en canto ao partido xudicial de Condado-Paradanta, a alcaldesa de Ponteareas Nava Castro será substituída como deputada polo alcalde de Covelo, Pablo Castelo.
"Loxicamente, isto vai levar unha repartición das competencias que tiñan", avanzou o presidente da Deputación que aproveitou para "agradecer publicamente, o inmenso traballo que fixeron a favor da provincia, coa entrega máxima". Segundo engadiu, Nava Castro e Sandra Bastos "sacaron adiante proxectos que son unha referencia no conxunto da provincia que van ter continuidade no tempo, goberne quen goberne, porque foi un completo acerto", dixo. Previsiblemente, no próximo pleno, neste mesmo mes de setembro, terá lugar a toma de posesión dos novos deputados.
