Aumenta a superficie do eucalipto en Galicia pesar da moratoria da Xunta
A asociación Apenfoga sostén que se plantaron 6.000 hectáreas máis de eucalipto en 2023 que en 2022 e urxe a outra prórroga para non plantar máis.
Por Europa Press / Redacción | SANTIAGO DE COMPOSTELA | 23/09/2025 | Actualizada ás 10:00
A Asociación Profesional de Enxeñería Forestal da Xunta (Apenfoga) instou a que o Goberno de Galicia se manifeste sobre o fin da moratoria do eucalipto en Galicia, que se extingue o próximo 31 de decembro, e suxire a prórroga do período.
Nun comunicado trasladado aos medios este luns, a asociación explicou que en 2021 prohibiuse temporalmente novas plantacións de eucalipto, pero non se programou "ningún tipo de análise da evolución da especie", nin houbo previsión "do desenvolvemento dunha regulación do seu uso".
Por iso, a Apenfoga sinalou datos do Inventario Forestal Continuo de Galicia (IFCG) que estiman que a superficie de eucalipto en 2023 era de 419.051 hectáreas, o que significa un aumento respecto ao ano 2022 do 1,4% --ou 6.000 hectáreas máis--. O dato, sostén a asociación, "evidencia o elevado número de plantacións ilegais de eucalipto que se están levando a cabo". Ademais, denuncia a Apenfoga que o feito chega a "desbordar a capacidade de medios e persoal encargado da inspección e denuncia dos Distritos Forestais".
PRORROGAR A MORATORIA
Así mesmo, a entidade insiste en que o período de moratoria debería ser utilizado para "establecer os criterios técnicos e normas para regular o uso da especie". No entanto, tendo en conta a "falta de análise sobre a evolución da superficie ocupada polo eucalipto" e a "ausencia absoluta dunha planificación básica do emprego da especie", a asociación urxe á Xunta a que prorrogue a moratoria.
Deste xeito estarían afectadas novas plantacións de eucalipto "ata que a Consellería de Medio Rural dispoña de información máis precisa achegada polo IFCG" e "haxa unha planificación necesaria para cumprir cos obxectivos establecidos na revisión do Plan Forestal de Galicia".
