Feirantes acusan ao Concello do Porriño de deixar as festas sen atraccións por segundo ano

Feirantes galegos denunciaron este xoves "irregularidades, improvisación e resolucións administrativas sen sustento legal" na organización das Festas do Cristo do Porriño, acusando ao Concello de incumprir as súas propias bases e de deixar á vila "sen atraccións de feira por segundo ano consecutivo". A Asociación de Empresarios de Atraccións de Feira de Galicia (Emafega) cualificou de "inxustificadas" as decisións do alcalde, Alejandro Lorenzo, que segundo aseguran "impiden a instalación das atraccións, cando no resto de Galicia a mesma documentación é aceptada sen problema".

Emafega lembrou que en 2023 as atraccións chegaron a montarse pero non puideron abrir, e que este ano nin sequera poderán instalarse, agás unha atracción concreta que foi aceptada, o que contrasta co rexeitamento ao resto. "No seu lugar, o Concello aposta por inchables e outro tipo de actividades que poden entreter puntualmente, pero non substitúen nin poden compararse co papel das atraccións de feira, parte inseparable da identidade das festas", criticaron.

A asociación reprochou que o Concello primeiro rexeitase as súas alegacións ás bases de adxudicación e logo incumprise esas mesmas regras. En concreto, lembran que nelas se establecía un único requirimento de subsanación, pero enviáronse dous, e que a resolución foi notificada o mesmo día no que xa debían estar montadas e autorizadas as atraccións, segundo recollían as bases.

Por todo isto, Emafega tachou a xestión municipal de "caótica e discriminatoria", asegurando que o goberno local "leva dous anos consecutivos privando ao Porriño das súas atraccións de feira". Ao seu xuízo, este tipo de decisións non só prexudican ás persoas que traballan no sector, senón tamén á cidadanía e ao atractivo das propias festas.