A Xunta levará os cribados de cancro aos centros penais

A directora xeral de Saúde Pública, Carmen Durán, anunciou no Parlamento que a Xunta de Galicia estenderá os cribados de cancro de cérvix e de colon aos centros penais, onde xa se realiza o de mama. Explicou que esta medida responde aos principios de universalidade e equidade, ao permitir unha atención máis completa das persoas vulnerables privadas de liberdade.

Durán presentou tamén os resultados dos programas de cribado poboacionais: o de mama, en marcha desde 1992, alcanzou unha participación global do 80% con case 14.000 casos diagnosticados, dos que o 70% estaban en estadios iniciais. No caso do cancro colorrectal, puxéronse en marcha 2,7 millóns de invitacións desde 2013, detectando preto de 2.900 cancros invasivos e máis de 26.000 lesións de risco. Pola súa banda, o cribado de cérvix, estendido en 2023 a todas as áreas sanitarias, xa permitiu diagnosticar 63 cancros cunha participación do 60%.

A directora destacou tamén dous programas piloto: o de pulmón, desenvolvido na área sanitaria da Coruña e Cee, onde participaron o 72% das 390 persoas convidadas, das cales o 7,4% foron derivadas á vía rápida de diagnóstico; e o de próstata, en Ferrol, no que se convidaron 12.000 homes e xa se detectaron 40 casos, maioritariamente en fases temperás.

Desde a oposición, a deputada socialista Elena Espinosa criticou que a comparecencia de Durán fose “propaganda” para ocultar a crise da Atención Primaria, que considera “abandonada” pola Xunta. Pola súa banda, a nacionalista Iria Carreira valorou positivamente os cribados, pero advertiu da necesidade de que a primaria estea en condicións de responder á demanda asistencial derivada destes programas.