Absolven en Pontevedra a un acusado de agredir sexualmente á que era a súa parella

A sección cuarta da Audiencia Provincial de Pontevedra absolveu a un home acusado dun delito de agresión sexual tras determinar que non se puido acreditar a falta de consentimento nas relacións coa súa exparella sentimental. O tribunal considera que o acusado prestou unha declaración “sen fisuras nin contradicións” e negou con firmeza os feitos.

Pola contra, o testemuño da denunciante foi considerado “insuficiente e con deficiencias” para desvirtuar a presunción de inocencia. Ademais, a sentenza sinala que o seu relato puido estar condicionado polo resentimento derivado da ruptura e das sospeitas de infidelidade.
A resolución non é firme e pode ser recorrida ante o Tribunal Superior de Xustiza de Galicia (TSXG).