Barreiro pide reformar a lei electoral para "evitar situación de inestabilidade"
O voceiro do PP no Senado di que, deste xeito, se evitarían situacións como a actual e podería gobernar Mariano Rajoy.
Por E.P. | LUGO | 08/08/2016 | Actualizada ás 12:24
O voceiro do PP no Senado, o lucense José Manuel Barreiro, mostrouse partidario dunha reforma da lei electoral para que goberne a lista máis votada e evitar situacións como a que se dá no ámbito estatal de cara a unha eventual investidura de Rajoy.
"Máis alá de reformas que haxa que facer, seguramente unha delas para evitar estas situacións sexa a reforma da lei electoral; neste caso é unha cuestión de que ou ben defendemos o interese xeral do conxunto do país ou defendemos os intereses partidistas ou mesmo persoais", esgrimiu.
Barreiro considera que esta reforma sería boa para "evitar situacións de inestabilidade e de incerteza como se leva vivindo durante un ano", con dúas eleccións xerais en seis meses.
Con todo, ao seu xuízo, "o fundamental é responder ao que a sociedade española dixo, por segunda vez en poucos meses, que é que había que formar goberno porque iso é o que España necesita". "Ademais os españois dixeron claramente a quen encomendaban a formación dese goberno, que é ao PP e a Rajoy porque gañou as eleccións cunha diferenza maior ao segundo (o PSOE)", engadiu.
"Tanto o PSOE como Ciudadanos deben asumir esa responsabilidade que implica dar resposta a esa demanda que fixo a sociedade española. Sería insólito e unha grande irresponsabilidade someter a España a unhas terceiras eleccións", advertiu.
Barreiro carga sobre todo contra o PSOE, ao que atribúe estar "nunha postura de defensa de Pedro Sánchez". "E non o digo eu que o están a dicir personalidades moi relevantes como Felipe González e Zapatero", avisou.
"Sánchez ten que poñer por diante a defensa do interese xeral dos españois, que é conformar un goberno liderado por Rajoy e solucionar esta situación de incerteza que estamos a vivir", resolveu.
