Quen axuda a quen; Rajoy a Feijóo ou Feijóo a Rajoy?
O presidente galego en funcións nega que haxa un "distanciamento" co líder do seu partido, pero confirma que "cada un ten a súa propia campaña". De feito, confirma o ocultamento das siglas do PP e di que o seu partido é "Galicia".
Por Europa Press / Redacción | OURENSE | 19/09/2016 | Actualizada ás 15:13
Mariano Rajoy leva, prácticamente, toda a campaña electoral en Galicia. No seu partido apuntan que unha vitoria por maioría absoluta en Galicia podería ser un impulso as súas aspiracións a repetir na Moncloa. Sen embargo, na súa estratexia choca directamente con Alberto Núñez Feijóo, que está a realizar unha campaña moi personalista na que o nome do PP case que está nun segundo plano.
Por iso, o candidato do PPdeG á reelección na Xunta tivo este luns que aludir a este choque de estratexias dentro do propio Partido Popular. Así, negou que estea a marcar distancias co presidente do Goberno en funcións, Mariano Rajoy, ao non coincidir en practicamente ningún dos actos nos que participou o dirixente estatal durante a campaña electoral en Galicia e de feito. Ademais, suliñou que que está convencido de que se Rajoy "segue axudando", o PPdeG ten posibilidades de obter a maioría absoluta o próximo 25S.
Así o sinalou en Xunqueira de Ambía (Ourense), onde participou nun acto electoral xunto á conselleira de Infraestruturas e Vivenda, Ethel Vázquez; o presidente do PP ourensano, Manuel Baltar, e a cabeza de lista pola provincia, Marisol Díaz, para informar sobre as propostas do seu partido en materia de rehabilitación no rural.
En resposta a preguntas da prensa, Feijóo rexeitou que se estea a producir un distanciamento con Mariano Rajoy durante a campaña electoral galega, senón que a falta de coincidencia responde a unha "estratexia coñecida", que consiste en "pisar o territorio" e en que o PP de Galicia realice "15 ou 20 actos diarios" en "tódolos pobos aos que poidamos chegar".
"Cada un ten a súa propia campaña", insistiu o candidato 'popular', que "agradeceu" a Mariano Rajoy a súa participación durante esta xornada electoral en actos na provincia da Coruña. "A min tócame Ourense, Lugo e finalizarei en Ferrol", sinalou ao respecto.
"Se o presidente segue axudando como o está a facer temos posibilidades de obter unha maioría. Sei que é moi difícil e que non existe ningunha maioría absoluta no resto de España, pero ímolo intentar", dixo Feijóo.
O PP "É GALICIA"
Na súa intervención ante a prensa o candidato do PP "reiterou" o que xa se ve na campaña, é que tenta ocultar as siglas do seu propio partido. Así, suliñou que, despois de oito anos como presidente da Xunta, o seu "partido" nestes momentos é Galicia. "Vólvome presentar para ser o presidente de todos os galegos, os que nos voten e os que non, e iso é compatible con que son o candidato do PP de Galicia á Presidencia da Xunta", dixo.
Feijóo insistiu en que nestes momentos Galicia é o seu "primeira e exclusiva prioridade". Neste sentido comprometeuse a velar polos intereses dos galegos "por enriba de calquera ideoloxía, sigla ou partido".
