A CIG tamén denuncia a privatización do servizo de helicópteros contra incendios

A Consellería de Medio Rural acaba de pechar as bases de helicópteros propias: a de Vilarmaior no distrito forestal XIV de Verín Viana, a de Marroxo na provincia de Lugo e a do Campiño en Pontevedra. Pola contra, mantén abertas e operativas as bases de xestión privada de Toén e o Barco en Ourense, Portomarín en Lugo e a de Queimadelos en Pontevedra, todas elas pertencentes á empresa privada Natutecnia.

Helicópteros de loita contra os incendios forestais

“Esta decisión adoptouse por indicación da Dirección Xeral de Ordenación e Produción Forestal, que preferiu mandar o persoal fixo-descontinuo do SPDCIF a engrosar as listas do paro, mentres segue mantendo negocios privados especulativos á conta da loita contra os incendios forestais”, denunciaba hai uns días CCOO.

Tamén a CIG se suma a estas criticas e denuncia o peche destas bases públicas para que sexan xestionadas pola empresa Natutecnia.

A maiores do persoal propio das bases helitransportadas, hai que ter en conta que a Xunta rematou os contratos do persoal propio de reforzo de verán o pasado 1 de outubro, deixando sen persoal o período correspondente á ampliación do tempo de alto risco decidida pola Xunta (do 1 ao 15 de outubro).

“Responde isto á práctica á que nos ten desgraciadamente acostumados a Consellaría do Medio Rural, favorecendo sempre a privatización do dispositivo de loita contra incendios forestais, encargando a empresas privadas a xestión e aproveitamento das bases de utilidade e propiedade pública”, critica.

Neste sentido, denuncia que, a día de hoxe, o reforzo de verán do dispositivo de loita contra os lumes está xa na casa, e só se conta con brigadas do dispositivo público helitransportado con contrato ata rematar novembro pero sen helicópteros, e coas brigadas de empresa privada a pleno rendemento prestando máis funcións e durante máis tempo. Por iso, reclama un  servizo único profesional e público.