Zara Home (Inditex) reforza a súa aposta pola perfumaría coa súa primeira colección de fragrancias persoais

Zara Home, a liña do Grupo Inditex especializada en artigos para vestir e decorar a casa, reforza a súa aposta pola perfumaría co lanzamento de The Perfume Collectiones, a súa primeira colección de fragrancias persoais.

En concreto, a insignia de moda, que conta con fragrancias e ambientadores para o fogar, indicou nun comunicado que se trata dun "ambicioso proxecto" que ten como resultado unha serie de seis Eau de toilettes únicas, desenvolvidas en colaboración con dous dos máis reputados perfumistas a escala internacional como son Alberto Morillas e Jérôme Épinette.

Para o desenvolvemento do frasco e o 'packaging', Zara Home traballou con Fabien Baron, director de arte das máis prestixiosas campañas de imaxe da industria da moda e a beleza.

As novas fragrancias estarán dispoñibles nas tendas de Zara Home e no seu web dende o próximo 2 de decembro a un prezo de 29,99 euros. Trátase dunha colección de fragrancias unisex que transportan co seu perfume a momentos íntimos, cotiáns do día a día. Así, cada olor evocará un recordo único na persoa, espertará un sentimento de familiaridade, de pertenza.

Zara Home naceu en 2003 e conta na actualidade con máis de 520 tendas que están repartidas por 60 países e hai uns meses sorprendeu co lanzamento de 'Laundry', unha liña propia de suavizantes e deterxentes.

O Grupo Inditex segue apostando así polo mundo da cosmética e perfumaría, despois de que hai uns meses Oysho, a súa liña de roupa interior, de deporte e 'homewear', entrase neste segmento co lanzamento do seu primeiro perfume.

En concreto, a insignia lanzou ao mercado .1, unha creación inspirada nos valores de Oysho, que se presenta como unha experiencia sensorial que complementa a colección da sinatura no seu formato máis persoal.