Polémica por un convenio coa COPE en Vedra
"O alcalde usa diñeiro público para que un medio lle faga gabanzas", acusa un concelleiro da oposición; o acalde responde en declaracións a GC que se trata de promocionar o municipio. Contrato no interior.
Por Manuel Vilas | Vedra | 24/03/2017 | Actualizada ás 14:00
Roberto Castro Rocamonde, concelleiro da oposición (BNG Asembleas Abertas), denunciou o asunto ante o interventor municipal. Na denuncia o edil asegura que o documento “ten a aparencia dun acordo amigable entre o alcalde (PP) e Radio Galicia S.A –Cope, no cal o alcalde utiliza diñeiro público para dar a un determinado medio de comunicación e que por outro lado este faga públicas gabanzas ao rexedor”. Segundo a documentación á que tivo acceso GC, o municipio paga 250 euros ao mes máis IVE por isto.
En declaracións a GC, o alcalde Carlos Martínez Carrillo (PP) nega estas acusacións. Para el o acordo " supón a posibilidade de dar publicidade a parte das moitas accións socioculturais, turísticas, obras e de toda índole realizadas e outras de interese para o municipio; da mesma maneira que temos convenios con outros medios de comunicación para a implantación de cuñas publicitarias, etc,… tanto de accións municipais como de distintas asociacións que así o solicitan ao longo do ano".
Segundo o relato do edil opositor, cando pediu información sobre o acordo con COPE o Executivo Local facilitoulle o documento que ilustra esta noticia. Malia levar o título de “contrato de colaboración”, non consta nin data de formalización nin duración, requisito legal imprescindible de calquera contrato público. O alcalde pola súa banda indica que "firmouse un primeiro para o ano 2016, e este ano firmouse un novo para o 2017".
Castro Rocamonde alerta que tampouco hai Resolución da Alcaldía aprobando o gasto. GC comprobou que no perfil do contrante da web municipal non está publicado este “contrato de colaboración”.
Nas actas da Xunta de Goberno en 2016 si aparece a apobación mensual das facturas baixo o nome “Concerto de colaboración para emisión de información sobre o concello de Vedra de feb. a dec. de 2016”. O político do PP argumenta que o "convenio ou acordo anual" ten "pouca relevancia ecnómica" polo que el como alcalde pode aprobalo sen ser necesario expediente de contratación, algo que "é habitual nos concellos galegos".
O representante do BNG láiase que COPE obvia as denuncias da oposición mentres que, por exemplo, o “importe pagado no ano 2016, máis de 3.000 euros, para Vedra é similar ao que este concello inviste nun servizo como transporte público, que en Vedra é totalmente deficiente e ineficaz por falla de proxecto e de investimento”. O alcalde do PP rebate que o convenio anual "é máis vantaxoso que facer contratacións puntuais para os mesmos servizos" puntualmente.
