Os incendios non dan tregua: 230 hectáreas en Narón e 30 en Oza-Cesuras

Dous incendios forestais permanecían activos na mañá deste venres nestes municipios. A provincia da Coruña está a ser castigada por unha vaga de lumes.

Por E.P. | SANTIAGO DE COMPOSTELA | 21/04/2017 | Actualizada ás 10:29

Comparte esta noticia

Dous incendios forestais permanecían activos na mañá deste venres nos municipios coruñeses de Narón e Oza-Cesuras, que queimaron unhas 230 e 30 hectáreas, respectivamente. Así o informou a Consellería do Medio Rural, que indicou que seguía activo o incendio declarado ás 9.49 horas do xoves na parroquia de Val no municipio de Narón.

Incendio forestal en Narón
Incendio forestal en Narón | Fonte: @Batallont15 en Twitter.

Ademais, Medio Rural confirmou que permanecía decretada como medida preventiva a situación 2 por proximidade do lume ao núcleo do Picheiro, na parroquia de Covas, no municipio de Ferrol.

No control deste incendio levan traballado sete axentes, 15 brigadas, 14 motobombas, dúas pas e cinco helicópteros. Tamén colaboran efectivos da Unidade Militar de Emerxencias (UME).

O incendio iniciouse á primeira hora da mañá do xoves na parroquia naronesa do Val e traspasou este municipio para chegar a Ferrol, á zona de Ponzos, en Covas, onde á primeira hora da noite do xoves, sobre as 22.30 horas, foron desaloxados por precaución os veciños de media ducia de vivendas unifamiliares do lugar de Covarradeiras, que xa puideron regresar ás súas casas.

Ademais, estaba activo outro incendio forestal desde as 2.09 horas deste venres na parroquia de Cis do municipio de Oza-Cesuras, que afecta a unhas 30 hectáreas de superficie. No seu control traballan tres axentes, seis brigadas, catro motobombas e un helicóptero.

Imaxe de satélite na que se apreza o fume dos incendios na zona de Narón
Imaxe de satélite na que se apreza o fume dos incendios na zona de Narón | Fonte: @15T209 en Twitter.

Mentres, quedou controlado ás 1,55 horas deste venres outro lume na parroquia de Vizoño en Abegondo, tras comezar ás 17.49 horas do xoves e queimar unhas 46 hectáreas, delas 38 de monte arborado e oito de raso.

Na extinción deste incendio forestal, segundo concretou Medio Rural, traballaban dez axentes, oito brigadas, cinco motobombas, dúas pas e un helicóptero.

EXTINGUIDOS

Ás 00.04 horas deste venres quedou extinguido o lume rexistrado na parroquia de Deveso do municipio coruñés das Pontes de García Rodríguez, que comezou ás 6.10 horas do xoves. As últimas estimacións sitúan a superficie afectada en 30 hectáreas, das cales 20 son de monte arborado e dez de raso.

Así mesmo, desde as 21.07 horas do xoves está extinguido outro incendio declarado ás 22.36 horas do mércores no municipio de Negreira. As últimas estimacións sitúan a superficie afectada en 131 hectáreas, delas 101 de monte raso e o resto de arborado.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Arturo

Corrección do titular: Os incendiarios non dan tregua. Xa é casualidade que, cando se dan as condicións óptimas ( sequía, vento, etc) é cando aparezcan " por arte de maxia" mais incendios. Repetimos: o monte non arde só. As árbores sexan as que sexan non arden por combustión espontánea. E algo que deberían repetir todos os días todos os partidos políticos.

1 leñalmono

Darche a razón e engadir que o que compre é unha análise do tipo de tara mental dos pirómanos que fan isto e publicalo en todas partes. Se non hai vergonnha, hai desvergonha. Logo duns meses en que eses vermes vexan cómo se lles sinala e aparta do común da sociedade, baixarán o seu nivel de tolemia. Iso xa se fixo noutros lados con bó resuldado. Non pode ser que poñamos centos de millóns en tolos, cando estamos no terceiro mundo en I+D ou sanidade.