Por E.P. | SANTIAGO DE COMPOSTELA | 19/10/2017 | Actualizada ás 14:06
Uns 60 colectivos ecoloxistas, agrarios e sindicais impulsan unha iniciativa lexislativa popular (ILP) para un cambio no modelo de xestión do monte galego e de loita contra o lume. Representantes da rede Cousa de Raíces, que promove esta ILP, presentaron esta semana a documentación no Parlamento galego coa que se pon a marcha o proceso polo cal deberán recoller 10.000 sinaturas para poder debater na Cámara a toma en consideración desta iniciativa.
Fins Eirexas (Adega), un dos portavoces de Cousa de Raíces, sinala que con esta proposta búscase "revitalizar e facer un mundo rural vivo" en Galicia, que "é a única garantía de que non se sufra" a vaga de incendios dos últimos días.
Tamén se marca o obxectivo de "parar os pés ao eucalipto" no monte galego, en defensa do bosque autóctono, xa que "sen un monte eucaliptizado habería menos incendios".
Dado que o cambio climático "está aquí para quedar", remarca que "sobre as causas dos lumes pódese actuar", e "unha moi importante é sobre o modelo de aproveitamento forestal", posto que "hai outra forma de facer as cousas".
De feito, Eirexas di que "mesmo dando por boa esa teoría disparatada" de que "existe esa trama organizada", "esa especie de sindicato do mal" que "se dedica a pór lume todos os anos", pregúntase: "Como arderá menos o monte?". "Coa actual situación, chea de eucaliptos, cun abandono brutal, onde só os intereses especulativos das pasteiras e as mineiras teñen cabida ou con outro modelo de explotación do rural moito máis multifuncional e sustentable?", cuestiona.
CHAMAN A UN APOIO "MASIVO"
Por todo iso, Fins Eirexas fai un chamamento á poboación a que "canalice esa indignación" que provocou nos galegos a última vaga de incendios para que haxa un apoio "masivo" a esta ILP e "force ao PP a retratarse".
"O que queremos é trazar unha liña vermella, os que están ao lado do bosque autóctono, de parte dun mundo rural multifuncional e sustentable teñen que apoiar esta ILP; o contrario significa porse de lado do eucalipto, de ENCE, dos lumes", asegura. Por iso, contrapón "cambiar de sistema" ou "seguir con esta morte lenta".
Esta é a terceira ILP de carácter forestal "en menos de 30 anos", explica Eirexas, "o que dá unha idea da preocupación que hai na sociedade" e "a necesidade de articular dunha vez medidas" para evitar "a secuela dos lumes forestais".
MEDIDAS
Entre outras medidas, con esta ILP avógase por ordenar o territorio, facer unha xestión das masas boscosas, apostar por monte multifuncional e fálase de crear franxas de seguridade.
Nesta liña, o presidente da Asociación Galega de Comunidades de Montes, Xosé Alfredo Pereira, deixa claro que a política forestal fai que o lume sexa "un problema por 'secula seculorum' para o monte galego" porque "non atalla os problemas" existentes.
Así, subliña que "a solución nos incendios forestais está moi vinculada a conseguir un modelo de monte totalmente distinto ao modelo do PP", baseado no "monocultivo forestal" e "arrincar o modelo de xestión aos titulares" para que "empresas poidan campar ás súas anchas".
SEN AXUDAS PARA PREVENCIÓN MANUAL EN MONTES
Una das cuestións sobre as que chamou a atención Pereira é que as axudas forestais "aparecen a destempo", entre agosto e setembro, "cando xa non é o prazo".
Tamén resalta que "hai moitos montes veciñais que non puideron acollerse" a liñas de axudas de prevención de incendios forestais porque se fixa que "só poden ser (traballos) mecanizados", cando ese labor "é imposible" en moitas zonas e debe ser manual.
"O lóxico é que permitisen as dúas fórmulas, manual e mecanizada", afirma o presidente da Asociación Galega de Comunidades de Montes, pero lamenta que non o fan "porque é un negocio para as empresas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.