Pili Carrera expón o ERTE por "problemas de liquidez" puntuais

A dirección da téxtil Pili Carrera trasladou este mércores aos traballadores a súa intención de expor un Expediente de Regulación Temporal de Emprego por 100 días (aínda que precisou que cada traballador afectado estaría regulado un máximo de 45 días)para 120 empregados do centro de produción de Mos, e explicou que se trata dunha medida para liquidar un "problema de liquidez" puntual e asegurar a compra de materia prima.

Así o explicaron fontes do sindicato CIG (o maioritario no comité de empresa) a Europa Press, e sinalaron que a regulación de emprego afectaría tanto a persoal da área de produción como ás oficinas e persoal administrativo.

Con respecto aos motivos para propor esa medida, e aínda que a empresa esgrimiu esa "falta de liquidez", os sindicatos non entraron a valorar se realmente é necesario un ERTE, aínda que manteñen que, a priori, e após os resultados do pasado ano, non debería ser unha opción. En todo caso, sinalaron que a empresa aínda non lles facilitou a información completa acerca da situación na que se atopa a firma.

No entanto, si que expresaron que "a empresa non corre perigo" e que, en todo caso, a dirección garantiulles que non se deslocalizará produción e que se manterá o traballo na fábrica de Mos.

No encontro deste mércores non se avanzou en ningún aspecto relacionado co ERTE, máis aló de aprobar un calendario de reunións. Segundo o devandito calendario, sindicatos e empresa volverán sentar o vindeiro luns ao mediodía para empezar a analizar a documentación económica e valorar "se hai razóns ou non para facer un ERTE".