A procesionaria ameaza o Monte Pindo
Niños da Thaumetopoea pityocampa chegaron xa a Carnota e ameazan as poucas masas de piñeiros do Pindo.
Por Galicia Confidencial | Carnota | 09/03/2018 | Actualizada ás 13:56
Unha praga de Thaumetopoea pityocampa, máis coñecida coma a procesionaria, infesta xa os piñeiros carnotáns, contándose por ducias os seus niños, segundo denuncia Monte Pindo Parque Natural.
“A pesar dos chamamentos veciñais ao distrito forestal para que interveña na problemática antes de que sexa demasiado tarde, ao parecer foron infructuosos e aínda non se achegaron ao noso municipio para coñecer o alcance da invasión e estudar como poñerlle remedio”, indica esta asociación.
De feito, esta entidade leva anos avisando dos múltiples perigos (tamén biolóxicos) que ameazan a biodiversidade do medio natural, coma os eucaliptos e outras especies invasoras que ateigan o Monte Pindo. Especies, como a vespa velutina, que ameazan a fauna e a flora local, coma o carballo anano.
