Por Telmo Martín | Pontevedra | 17/03/2011
En maio de 2009 presentamos no xulgado unha denuncia pola adxudicación irregular do axardinamento da Praza da Liberdade e por contratar a construción dunha glorieta en Loureiro Crespo saltándose a legalidade e cunha adxudicación a dedo.
Aquela actuación irregular orquestrada por Raimundo González foi un despropósito. Nove meses despois de que as obras foran inauguradas polo alcalde e polo edil de facenda convocouse unha mesa de contratación para montar un teatrillo. O noso concelleiro Jacobo Moreira deuse de conta da manobra que o goberno de Lores estaba tratando de executar.
O mandato está a piques de rematar. Durante estes catro anos, Raimundo González firmou actuacións que o converten no peor concelleiro de facenda da historia democráctica de Pontevedra. Autorizou gastos irregulares por 11M€ durante estes catro anos. Dos catro orzamentos que leva o mandato só foi quen de aprobar dous, e un con 7 meses de atraso. Pontevedra é a única das grandes cidades de Galicia que a estas alturas do ano non ten documento económico. Estes feitos xustificarían que se marchara para casa. O engano, a mentira e a manipulación son as armas preferidas de Raimundo González para defenderse do que non ten defensa.
O caso de Naturgalia centra este post, pero sería posible escribir un libro sobre a xestión económica deste goberno. Hai provedores sen cobrar e unha longa relación de asuntos que o goberno recurreu en segunda instancia para intentar evitar os intereses de demora.
Temos moi claro que o señor Raimundo González non é a persoa adecuada para xestionar os cartos dos pontevedreses. Ao principio do mandato propuxemos no Pleno a súa reprobación porque xa daquela as facturas de pequenos provedores comezaban a acumularse, ao igual que os recoñecementos extraxudiciais.
O concelleiro de facenda ten por costume dicir que xestiona como quere. Agora xa sabe que non pode actuar con impunidade. Xa veremos que nos atopamos cando cheguemos ao goberno…