Abren a segunda edición de 'Conecta Fiction' en Santiago

O acto de inauguración da segunda edición do certame 'Conecta Fiction', que arrinca este luns en Santiago cunha gala que terá lugar no Auditorio Abanca. Así, Galicia converterase de novo nun punto de encontro para a industria das series de televisión con 'Conecta Fiction', un evento que incrementa nun 20 por cento o número de acreditados e xa esgotou as prazas dispoñibles, segundo informa a Consellería de Cultura.

Deste xeito, entre os días 18 e 21 de xuño uns 500 profesionais de 20 países daranse cita na capital galega nun evento que ten por obxectivo tecer rede entre o sector da ficción televisiva. A Xunta de Galicia, ICEX e Fundación SGAE promoven unha iniciativa que reunirá na Cidade da Cultura ás principais canles de televisión do mundo, como Netflix, HBO, Mediaset ou Amazon.

Ademais, este ano incorpórase ao evento un festival de series titulado 'Conecta Fiction Fest', que estará dedicado exclusivamente ás producións de Movistar+, que presentará a súa oferta os días 21 e 22 no Teatro Principal e o Auditorio Abanca.

INAUGURACIÓN

A gala de inauguración terá lugar este luns a partir das 19,30 horas no Auditorio Abanca, onde o músico galego Xabier Díaz presentará o seu último traballo.

Durante a gala presentarase 'Limbo', a nova ficción da plataforma dixital de RTVE, 'Playz'. Trátase dunha serie de misterio creada por Nicolás Britos e cun elenco no que figuran actrices emerxentes como Ingrid García-Jonsson e intérpretes consolidados, como Eloy Azorín.