Patricia Mallo gaña o I Premio de Literatura Infantil Carlos Mosteiro

A escritora foi galardoada pola obra "Os fantom", que se impuxo aos 39 orixinais presentados nesta primeira edición e que será publicada o vindeiro outono pola Editorial Galaxia.

Por Galicia Confidencial | SANTIAGO DE COMPOSTELA | 21/06/2018 | Actualizada ás 14:34

Comparte esta noticia

O xurado composto pola escritora e académica Fina Casalderrey, a profesora Blanca Ana Roig Rechou e o director xeral da Editorial Galaxia Francisco Castro, decidiu por unanimidade declarar gañadora do I Premio de Literatura Infantil Carlos Mosteiro á obra Os Fantom de Patricia Mallo.

Carlos Mosteiro
Carlos Mosteiro | Fonte: Wikipedia

O xurado destacou da novela gañadora o seu marcado sentido do humor á hora de narrar a viaxe da familia Fantom, unha familia de pantasmas con superpoderes, desde a "cidade gris" ao "mundo de máis aló", ao "mundo dos vivos, xunto á Cidade Xardín". Así mesmo, sinalan que a narración conta cun ritmo áxil que se ve reforzado polas situación divertidas que van xurdindo nunha trama onde "nada é o que parece ser". E salientan que Os Fantom é unha defensa da singularidade, da identidade de cada quen e da súa aceptación.

O PREMIO

Patricia Mallo  estudou Comunicación Audiovisual na Universidade de Vigo e traballou en países como México, Italia, Reino Unido ou a India. Tras escribir e producir a curtametraxe ¿Amigos?, o pasado 2016 debutaba en Galaxia coa novela infantil Os Cabezombis na Mansión Espello, onde xa mesturaba os seus temas preferidos: o humor, o misterio e a fantasía.
O I Premio de Literatura Infantil Carlos Mosteiro, nacido neste mesmo ano, e convocado polo Conello da Pobra do Caramiñal, a Editorial Galaxia e a A. C. Barbantia, ten como finalidade honrar a figura de Carlos Mosteiro, escritor fundamental da LIX galega e fortemente vencellado á comarca do Barbanza, que finaba o pasado xullo de 2017; ao tempo que se aposta pola creación en galego para o lectorado máis novo. O premio consiste na publicación da obra por parte de Galaxia na súa colección Árbore e 1.500 euros para a gañadora.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta