A investigación dos lumes do 2017 remata sen poñer couto aos eucaliptos e sen responsabilidades políticas

O ditame saído da comisión de estudo de incendios e política forestal --creada por mor da vaga de lumes de outubro de 2017 que arrasou unhas 50.000 hectáreas en Galicia e deixou catro falecidos-- aprobouse este martes no pleno do Parlamento só cos votos a favor de PPdeG e PSdeG, mentres que o rexeitaron En Marea e BNG.

Do mesmo xeito que ocorreu no peche da comisión de incendios a finais de xullo, non se acadou un acordo de futuro sobre política forestal que sexa defendido por todas as forzas políticas, tras o paso duns 60 comparecentes por un órgano que quedou constituído o 28 de novembro de 2017. Con todo, destes meses de traballo saen máis de 100 recomendacións.

Durante o debate, o deputado do PPdeG José González acusou a En Marea e BNG de que votan en contra deste ditame "atendendo unicamente a cuestións ideolóxicas", xa que sostén que a maioría das recomendacións son apoiadas por todos os grupos, e pon como exemplo que o Bloque só votou en contra de oito propostas das máis do centenar que saen adiante.

Pola súa banda, o portavoz parlamentario do PSdeG, Xoaquín Fernández Leiceaga, defendeu un texto que supón unha "gran oportunidade para modificar de raíz unha política equivocada", mentres reprocha a En Marea e Bloque que non o apoien a pesar de que todos os grupos apoien "máis do 80%" das conclusións.

En cambio, as formacións rupturista e nacionalista presentaron senllos votos particulares ao ditame que foron rexeitados polo PPdeG --coa abstención do PSdeG--. Davide Rodríguez (En Marea) defendeu o seu voto en contra a este ditame porque "non cambia substancialmente a problemática dos incendios deste país".

Mentres, Xosé Luís Rivas, Mini (BNG), sostén que este texto "non aproveita a ocasión para emendar as políticas suicidas" do PP, xa que bota en falta "a columna vertebral" de medidas para dar "un xiro de 180 graos".

ACORDO DE PP E PSOE

Deste xeito, PPdeG e PSdeG coincidiron na posta en valor deste ditame aínda que non naza da unanimidade. Antes de que se producise a votación José González cría posible chegar a un "acordo de país", "porque todo o que vostedes dixeron está recollido na recomendacións", dixo a En Marea e BNG.

E é que o popular considera que é un ditame "plural", "multidisciplinar" e que profunda nas causas "estruturais" dos incendios, que considera "bo" para o monte e o rural. Por iso, espeta a estes dous grupos que se valen da "utilización da ideoloxía" para non votar un ditame que "saben perfectamente" que recolle as súas peticións, lamenta.

A continuación, Leiceaga valorou que este ditame "é un exemplo" na parte descritiva, pois recolle "ben" o que pasou na comisión, "sobre todo pola parte propositiva". "Era unha oportunidade que por responsabilidade decidimos aproveitar", sentenza.

Con todo, afirma que os socialistas asumen "riscos", dado que hai: "Unha parte do ditame que non compartimos completamente". Con todo, asevera que vale a pena porque "se vai a cambiar a política forestal", dado que "se rectifica en profundidade a política destes anos" de " laissez faire".

Ademais, o portavoz socialista afirma que este texto "pon en valor" as políticas do bipartito, coa "recuperación das política de Emilio Pérez Touriño e da Consellería de Suárez Canal", á vez que se poñen "deberes" á Xunta. "Imos condicionar o plan forestal co que aprobemos hoxe", deixou claro.

Tamén apunta Fernández Leiceaga que hai un "cambio substancial do centro de gravidade das políticas forestais", coa recuperación do banco de terras, unha separación entre a produción forestal e a política antincendios, así como o control parlamentario para o cumprimento de compromisos.

Xa o informe da comisión dos incendios de 2006 durante o bipartito aprobouse sen unanimidade. Naquel entón o PP non participou nese órgano ao considerar que debía ser de investigación.

"PERDEMOS UNHA OPORTUNIDADE DE OURO"

"Coa redacción destas recomendacións perdemos unha oportunidade de ouro", deste xeito queixouse Davide Rodíguez sobre as conclusións da comisión tras meses de traballo. Así, pregúntase "cal foi o motivo polo que o equipo redactor non foi valente" para acadar unhas recomendacións "acordes á altura que este país se merece".

E é que En Marea e BNG coinciden en que faltan elementos chave no texto como poñer coto ao eucalipto, remodelar o sistema de extinción cunha aposta pola homoxeneización e contra a precarización, así como apostar polas Unidades de Xestión Forestal ( Uxfor), entre outras.

En cambio, Xosé Luís Rivas censurou que con este ditame o PPdeG busca "difuminar a súa responsabilidade" na vaga de incendios do pasado outubro, xa que "non hai mención a responsabilidades políticas", ao que se une unha " inconcreción" de temas centrais sobre o monte.

Sobre este extremo, cargou contra o "caótico modelo" do monte actual mentres se padecen vagas de incendios cada vez máis virulentas. Por tal motivo xustifica a necesidade dun ditame "alternativo" que defenda a " multifuncionalidad" e a "biodiversidade".

A votación do ditame concluíu coa anécdota de que a propia presidenta da comisión, a popular Raquel Arias, non votou a favor do mesmo por erro, cuestión que corrixiu tras comunicarllo de palabra ao presidente da Cámara.

RECOMENDACIÓNS

Desta comisión saen máis dun centenar de recomendacións como a posta en marcha dun ente instrumental específico --dependente da Xunta-- que coordine a todas as administracións en materia de prevención de incendios e vixilancia de incumprimentos, con asesoramento estable aos concellos.

Ademais, recoméndase a creación dun grupo de expertos --elixidos polos grupos parlamentarios-- que antes do período de alto risco de 2019 estableza melloras para o servizo de extinción. Para a investigación chámase a progresar na coordinación entre corpos e o uso de novas tecnoloxías.

Tamén se propón determinar que parcelas están abandonadas en Galicia, mentres para a mellora das franxas de seguridade potenciarase que nestes espazos se desenvolvan actividades agrarias ademais de rozas.

Entre estas máis de 100 medidas, se aposta por: unha ordenación integral do territorio, potenciar as competencias da Axencia Galega de Desenvolvemento Rural, a multifuncionalidade do monte, a gandería en extensivo, a inclusión obrigatoria de frondosas autóctonas nas plantacións produtivas e incentivos fiscais no rural. Todo iso nun texto no que se identifican problemas estruturais como o abandono, a estrutura do territorio e a súa ordenación, así como o cambio climático.