Por E.P. | SANTIAGO DE COMPOSTELA | 30/10/2018 | Actualizada ás 13:52
A subida da peaxe da Autoestrada do Atlántico, a AP-9, nun 2 por cento a partir deste mércores, véspera da ponte de Todos os Santos, volverá ao debate parlamentario no pleno da próxima semana --6 e 7 de novembro--. Os grupos piden, con diferenzas e matices nos seus posicionamentos, bonificacións e reducións da peaxe desta vía que vertebra Galicia de norte a sur e que non conta cunha alternativa sen custo.
O Boletín Oficial do Estado (BOE) publicou na súa edición deste martes, 30 de outubro, o decreto polo cal as tarifas se incrementarán xa un 2 por cento. As peaxes xa se encareceron no principio do ano un 1,9% e agora enfrontarán unha nova subida, ao que hai que engadir que a principios de 2019 volverán aumentar o seu prezo.
Neste escenario, o portavoz parlamentario do PSdeG, Xoaquín Fernández Leiceaga, considerou que os "convenios hai que cumprilos", é dicir, que esta subida ten que producirse xa que estaba vinculada ás obras na autoestrada.
"Nós defendemos hai uns meses e seguimos dicindo hoxe que unha opción alternativa é que Fomento asuma con cargo aos seus fondos os custos derivados, un sistema como a peaxe na sombra. Seguimos dicindo isto, dixémolo hai uns meses e seguímolo dicindo hoxe", manifestou Leiceaga, quen afeou ao PPdeG que cando gobernaba Mariano Rajoy non se sumase a esta postura pero agora si.
O dirixente socialista tamén quixo lembrar que o Goberno actual "está a xestionar o orzamento de Rajoy". "Non hai contemplado ningún euro, hai que facer un esforzo para abaratar a peaxe da AP-9", incidiu Leiceaga.
ANULACIÓN DA A-57 E RESCATE
Outra opción foi a que puxo encima da mesa o portavoz de En Marea, Luís Villares. En primeiro lugar, pediu que non se aplicase o convenio e que sexan os tribunais os que diriman se é de obrigada execución ou non, respecto diso do que asegurou que "existen elementos legais dabondo para evitar que se dea impunemente un novo sablazo".
"A primeira exhortación é impedir (a subida), que se regulen que non se poida subir, e se a empresa está en desacordo, que recorra a medida", pediu Villares, quen como segundo elemento reclamou de novo o traspaso da titularidade da autoestrada.
Deféndeo coa proposta de "anular o proxecto construtivo da A-57, que duplica unha vía existente a menos de 10 quilómetros de distancia" da AP-9, e que supón "unha barbaridade económica e ambiental". Fronte a iso, aposta por destinar os 1.200 millóns de euros previstos no proxecto de rede de estradas do Estado a rescatar para o público a autoestrada.
PEAXE REDONDELA
Os populares levarán á próxima sesión plenaria, de novo, a petición ao Ministerio de Fomento de eliminar a peaxe en Redondela que, en palabras do seu portavoz parlamentario, Pedro Puy, crea unha situación de "discriminación" para eses usuarios fronte aos que proceden de Cangas.
O portavoz parlamentario do PPdeG fixo mención a que "se van a empezar a aplicar as subidas das peaxes da AP-9" pero, con independencia doutras cuestións, "confírmase que o que fai é reforzar unha situación de discriminación dos veciños de Redondela, que sofren as consecuencias tamén do paso da autoestrada á beira das súas vivendas".
VENDA ACCIONES
A viceportavoz do BNG, Olalla Rodil, presentou unha iniciativa que os nacionalistas levarán ao pleno e que ten que ver coa venda das accións de Abanca en Itínere, o grupo ao que pertence Audasa --a concesionaria da autoestrada--.
Así, denunciou que o banco resultado da fusión das caixas de aforros galegas "está a desprenderse de boa parte dos proxectos empresariais deste país" e, por iso, preguntará ao Goberno autonómico se "fixo algo para impedir" esta situación con respecto á autoestrada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.