Por E.P. | VIGO | 31/10/2018 | Actualizada ás 11:50
O número de hipotecas sobre vivenda constituídas en Galicia durante o mes de agosto experimentou un incremento do 3 por cento con respecto ao mes anterior, até alcanzar as 1.002, o que supón tamén un incremento interanual do 4,9 por cento.
Así se reflicte no informe feito público este mércores polo Instituto Nacional de Estatística (INE), no que tamén se pon de manifesto que, nese período, as entidades prestaron case 95 millóns de euros na formalización desas hipotecas, o que implica un aumento do 1,1 por cento mensual e unha subida do 0,1 por cento interanual.
Segundo o INE, durante agosto constituíronse, ademais das 1.002 hipotecas sobre vivendas, outras 20 hipotecas sobre solares e 511 máis sobre outras fincas urbanas, con préstamos que superan lixeiramente os 52 millóns de euros. A estes datos hai que sumar a constitución doutras 52 hipotecas sobre fincas rústicas, por valor de 7,2 millóns de euros.
Así mesmo, no informe do INE establécese que se cancelaron rexistralmente 1.535 hipotecas en Galicia: 959 hipotecas sobre vivendas, 416 sobre outras fincas urbanas, 139 sobre fincas rústicas e 21 sobre solares.
Finalmente, con respecto aos cambios rexistrais sobre hipotecas, o organismo de estudos estatísticos indicou que, en agosto, producíronse modificacións en 209 leiras --100 vivendas, 195 leiras urbanas e 14 leiras rústicas--. Así, rexistráronse 185 novacións, 4 subrogacións de debedor e 20 subrogacións de acredor.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.