Por Europa Press / Redacción | SANTIAGO DE COMPOSTELA | 16/12/2018 | Actualizada ás 14:54
Un médico español, orixinario da Coruña, e outras tres persoas faleceron ao estrelarse un helicóptero de emerxencias sanitarias nunha zona montañosa preto da localidade do Porto, no norte de Portugal, segundo informaron os servizos de emerxencias do país.
O médico falecido foi identificado como Luís Veiga, cidadán español de 50 anos e, tal e como confirman fontes do Ministerio de Asuntos Exteriores, natural da Coruña. Veiga traballaba para o Hospital de Santa Maria da Feira (Aveiro) desde hai case dúas décadas e formaba parte do equipo de urxencias do INEM, segundo informou 'El Mundo'.
A canle de televisión RTP indicou que os catro pasaxeiros eran dous pilotos e dous membros do servizo sanitario. O primeiro ministro do país, António Costa, lamentou o sucedido."Quero expresar as miñas máis profundas condolencias aos familiares e amigos das vítimas e ter unhas palabras de solidariedade con todos aqueles que traballan para o Instituto Nacional de Emerxencia Médica (INEM) e ofrecen un servizo incalculable aos portugueses", manifestou Costa, segundo recolleu a axencia de noticias Lusa.
O INEM puxo en marcha unha operación de rescate para achar o helicóptero, que se esborrallou sobre as 6.30 da tarde (hora local) do sábado logo de deixar nun hospital do Porto a un paciente de 76 anos que sufría problemas cardíacos. O helicóptero dirixíase de volta á súa base no distrito de Bragança cando se estrelou debido ás malas condicións meteorolóxicas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.