Por E.P. | SANTIAGO DE COMPOSTELA | 18/01/2019 | Actualizada ás 12:15
A Xunta abonará xa na nómina do presente mes de xaneiro a subida do 2,25% do salario dos empregados públicos en virtude da aplicación do acordo asinado o pasado martes polo Goberno galego cos sindicatos CC.OO. e UXT.
O DOG publica este venres a orde de confección de nóminas para o ano 2019 da Consellería de Facenda e que supón un incremento medio anual de 810 euros por traballador, unha medida xa recollida nos orzamentos autonómicos para o recentemente iniciado ano.
Segundo sinala un comunicado emitido este venres polo departamento que dirixe o conselleiro Valeriano Martínez, a Xunta prevé que ao redor de 100.000 funcionarios galegos se verán afectados pola medida, entre os que se inclúen os empregados dos servizos públicos autonómicos, as universidades públicas e os centros de ensino concertados.
Ademais, o acordo de concertación social tamén establece que os empregados públicos percibirán unha subida salarial do 0,25% a partir do 1 de xullo de 2019. A Xunta recorda que esta porcentaxe "está condicionado ao cumprimento por parte do Reino de España do obxectivo de evolución do PIB do 2,5% correspondente ao anterior exercicio, é dicir, ao ano 2018".
A CIG REXEITA O ACORDO
Pola súa banda, a CIG reiterou este venres o seu rexeitamento ao acordo subscrito polos sindicatos UXT e CC.OO. coa Administración autonómica e que tampouco foi asinado por CSIF.
Nun comunicado, a central nacionalista recorda que CIG e CSIF "ostentan a maioría absoluta" na mesa xeral de negociación dos empregados públicos e que o acordo foi rexeitado nas cinco mesas provinciais --Servizos centrais, A Coruña, Vigo, Ourense e Pontevedra--.
Os motivos expostos pola CIG para rexeitar o acordo da carreira profesionais radican en que este sistema "supón un agravio comparativo e unha discriminación co persoal doutras administracións públicas, non só doutras comunidades autónomas, senón incluso dentro da propia Comunidade galega".
Ademais, a central cre que o sistema acordado "establece limitacións respecto ao persoal temporal e interino ao impedirlles acceder ao encuadramiento extraordinario" e fixa "unhas discriminacións intolerables entre os propios funcionarios de carreira da Xunta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.