A Xunta envía unha proposta de acordo marco a Fomento e ao Concello de Lugo para impulsar a intermodal

A Xunta de Galicia remitiu ao Ministerio de Fomento e ao Concello de Lugo unha nova proposta de acordo marco con "compromisos concretos" de todas as partes para impulsar a estación intermodal da cidade.

Nun comunicado remitido aos medios, a Consellería de Infraestruturas e Vivenda asegura que a proposta trasladada polo Goberno galego segue o modelo dos convenios marco asinados entre Fomento e os consistorios de Santiago e Ourense. Ademais, sinala que permitiron que as estacións intermodais destas dúas cidades estean "actualmente en plena execución".

"Trátase dunha versión actualizada da proposta de convenio remitida en marzo de 2018 a ambas as administracións, que foi contestada pouco despois, con observacións, por parte do Ministerio de Fomento pero nunca polo Concello de Lugo, a pesar dos sucesivos requirimentos da Xunta", asegura o departamento que dirixe Ethel Vázquez.

Co documento enviado este mércores, a Consellería de Infraestruturas asegurou que responde o borrador de protocolo formulado polo Ministerio de Fomento en días pasados. No escrito que acompaña a súa proposta, a Xunta advirte de que fai falta "un maior de concreción nas responsabilidades e compromisos de cada Administración" que o que formula o Ministerio.

Así mesmo, o departamento autonómico sinalou que a súa postura se basea en que existe xa un traballo realizado para o desenvolvemento da estación intermodal de Lugo, que permite fixar nun convenio metas máis ambiciosas que a mera vontade de estudar "conxuntamente" o impulso da infraestrutura que resume a proposta do Ministerio de Fomento.

Así, lembrou que contratou e realizou uns estudos de necesidades e alternativas para o desenvolvemento da nova estación de autobuses integrada na estación de ferrocarril. O resultado dese traballo, presentado hai un ano na cidade de Lugo, foi posto á disposición de Adif, que o empregou na elaboración do anteproxecto do conxunto intermodal, un deseño que ten xa moi ultimado, indicou.

Ademais, a Xunta, que lembrou que mantivo diversas reunións co Ministerio e o Concello, insistiu na necesidade de dar un paso máis no compromiso das Administracións para o impulso conxunto da estación intermodal. Por iso, comprometeuse a tramitar e axilizar o convenio coa máxima axilidade en canto o Concello de Lugo e o Ministerio de Fomento lle dean a súa conformidade.

POSTURA DO CONCELLO

Por outra banda, preguntada sobre as negociacións para a construción desta infraestrutura, a alcaldesa de Lugo, Lara Méndez, acusou á Xunta de "facer partidismo" con esta cuestión. "O que dicimos os lucenses é xa abonda, que non se pode facer partidismo con todo", expresou. "Nós cos técnicos da Xunta temos unha relación diaria, cordial, sempre tentando buscar solucións e puntos de acordo, e nesa liña levamos traballando meses", destacou a rexedora, que asegurou que se agora pódese ter un documento é "grazas ao traballo avanzado".

Por iso, considerou que o que "non se entende" é "a teima" do presidente da Xunta, Alberto Núñez Feijóo, de "parar todo" o que vai "a Lugo". "Non hai outra explicación, incluso a propia intermodal xa a mandou parar en 2012 cando deixaron nun caixón un proxecto adxudicado", censurou. Así mesmo, asegurou que na actualidade hai un protocolo que "está traballado" e que "é froito do encontro de tres administracións". "E non podemos seguir permitindo que os intereses partidistas, cando se achega unha cita electoral, volvan paralizar todo", manifestou a rexedora.

A alcaldesa de Lugo, Lara Méndez.