Falar do aborto "é algo que lle interesa ao PSOE e á esquerda", di Feijóo

O presidente da Xunta, Alberto Núñez Feijóo, asegurou este xoves que o Partido Popular "xa se ten pronunciado" sobre a actual lei do aborto --aprobada en 2010 baixo o Goberno de José Luís Rodríguez Zapatero-- e lembrou que ese asunto "está no Tribunal Constitucional" por mor dun recurso presentado entón polo seu propio partido, polo que apelou a "esperar" ao que diga este órgano.

Na comparecencia posterior á reunión co seu Executivo, o líder autonómico foi preguntado polas polémicas declaracións do presidente do PP, Pablo Casado, en asuntos sobre a interrupción do embarazo e a violencia de xénero. "Entendo que hai algúns temas que interesan ao Partido Socialista e á esquerda que forman parte do debate electoral, pero que non conten comigo para entrar a ese trapo, porque sobre eses asuntos xa nos temos pronunciado", aseverou.

Neste contexto, Feijóo expresou que lle gustaría que en asuntos "tan complexos" e con tantas "formulacións éticas" como o aborto debería "haber un gran consenso" como o alcanzado en 1985 coa primeira lei que o permitía. "Ese consenso crebouse, ese asunto está no Tribunal Constitucional e esperemos o que diga", engadiu. En calquera caso, o presidente da Xunta garantiu que "mentres as leis están vixentes", en Galicia "e no conxunto do Estado, cúmprense".

Para Feijóo, o debate sobre a interrupción do embarazo é un "asunto tan sensible que ten tantas sensibilidades como persoas", polo que "o presidente dun partido político, un deputado, un concelleiro ou calquera cargo ten o dereito de ter unha opinión persoal e a mostrala, a trasladala e a clarificala".

Ademais, sobre a violencia de xénero, insistiu en que "a desigualdade e o machismo é algo execrable" e, por iso, o seu Goberno "vai seguir loitando, afecte a quen afecte e diga o que diga o que non estea de acordo con isto".

Activistas en contra do aborto nunha protesta