O Igape pagou con diñeiro público "un cubalibre" a cada un dos 37 traballadores que cumprían 25 anos no organismo
O PSdeG reprocha levar "anos escoitando falar dos mojitos da Habana", un acto que para el se enmarca na "difusión da cultura galega", ao contrario ca este, di.
Por Europa Press / Redacción | SANTIAGO DE COMPOSTELA | 07/03/2019 | Actualizada ás 14:49
O Instituto Galego de Promoción Económica (Igape) vén de admitir que convidou a "un cubalibre" a 37 traballadores que cumprían 25 anos no organismo público a fins de novembro do ano pasado. Así o confirmou o seu director, Juan Cividanes, ante as acusacións do PSdeG sobre esta utilización de diñeiro público.
Cividanes recoñeceuno así nunha comisión parlamentaria ante as críticas do deputado do PSdeG Abel Losada. O socialista reprochou levar "anos escoitando" no Parlamento "falar dos mojitos da Habana", cando para el iso se enmarca nun "acto de fomento e difusión internacional da cultura galega". En concreto, referíase a un acto en Cuba durante o Goberno bipartito, na feira do libro e cando era conselleira de Cultura Ánxela Bugallo (BNG).
A fio disto, Losada viu "moi adecuado" comparar iso co 25 aniversario do Igape, polo que preguntara anteriormente unha parlamentaria do PP. "No Hostal dos Reis Católicos de Santiago, alí o que se pagaba con diñeiro público eran as copas de alta gradación dos traballadores, que parece que non estaban desde logo difundindo ningunha cultura galega especialmente relevante", censurou.
"CONVIDÁMOLOS A UN CUBALIBRE"
"No que respecta ao Igape eu voulle dar resposta. O que falaba dos cubalibres, non é como vostede... a información que vostede ten. O 25 aniversario celebrouse no Palacio de Congresos e (despois, no Hostal) houbo un recoñecemento a esas 37 persoas que citaba, que facían 25 anos no instituto cunha responsabilidade sobre a xestión dos fondos públicos. Démoslles unha placa de metacrilato e efectivamente convidámoslos a un cubalibre", respondeu Cividanes.
No acto do Palacio de Congresos, segundo precisou, houbo arredor de 500 participantes. Alí participou o presidente da Xunta, Alberto Núñez Feijóo, xunto ao conselleiro de Economía, Francisco Conde, e outras autoridades. O xefe do Executivo resaltou ese día que, ao longo destes 25 anos, o Igape axudou a máis de 81.000 empresas, que mobilizaron case 14.000 millóns de euros, datos que este xoves lembrou o director do instituto.
