Continúa a negociación do ERE entre a Dirección de Navantia e representantes sindicais para os maiores de 61 anos
O comité de empresa de Navantia Ferrol trasladou ao conxunto dos traballadores que "a dirección dá como probable a data de 30 de abril para o cesamento definitivo" destes operarios.
Por Europa Press / Redacción | SANTIAGO DE COMPOSTELA | 15/03/2019 | Actualizada ás 17:06
A dirección da empresa naval pública Navantia e os representantes sindicais non lograron pechar cun acordo a primeira das reunións da comisión de seguimento do Expediente de Regulación de Emprego (ERE) colectivo que afectará a todos aqueles traballadores que teñan 61 anos ou máis unha vez asinen o acordo, polo que continuarán coa negociación.
Segundo manifestaron diversas fontes consultadas, na reunión onde se constituíu dita comisión acordaran ambas as partes que o ERE a aplicar sería igual ao do ano 2005, pero a dirección da empresa trasladoulles, no encontro deste xoves, día 14, en Madrid, unha proposta diferente, o que motivou o rexeitamento da parte social.
A través dun comunicado interno, o comité de empresa de Navantia Ferrol trasladou ao conxunto dos traballadores que "a dirección dá como probable a data de 30 de abril para o cesamento definitivo" destes operarios, con "saídas ordenadas e con acordo mutuo entre o traballador e o responsable de cada centro de traballo", gozando previamente "as vacacións e o Tempo por Tempo que se tivese xerado".
Ademais, asegúrase que os traballadores afectados por esta baixa incentivada percibirán os complementos por convenio "unha vez estean estes consolidados", ademais de recibir as axudas de discapacidade, en caso de ter dereito a elas, "no momento que cese definitivamente en Navantia".
Tamén se recolle que "o persoal que durante a vixencia do expediente, concédaselle unha incapacidade, será o propio traballador o que decida a opción a que acollerse", mentres que aquel persoal que "ten pendente cotizacións para alcanzar o 100% da pensión entrará no expediente cando se cumpra esa condición".
FALECEMENTO
Ademais, o traballador que "en caso de falecemento non esgotase as prestacións que lle corresponda, serán os seus herdeiros legais os que terán o dereito a percibir a cantidade pendente". Por último, o persoal que está a traballar en Australia, unha vez entre en vigor o ERE, "causará baixa en Navantia-Australia e incorporarase de inmediato" a este plan de saídas anticipadas. Ambas as partes acordaron unha nova reunión que terá lugar o próximo 21 de marzo, de novo na sede central da compañía, en Madrid.
