Vivir Ourense, o novo partido do empresario Jorge Bermello

A nova formación política Vivir Ourense, baixo as siglas oficiais VOU, presentarase ás municipais coa intención de "aprobar a PXOM de maneira inmediata, respectando os trámites legais" e coa idea de "presentar os orzamentos do ano 2019 no mes de setembro, para a súa discusión e aprobación, e os de 2020 no mes de novembro".

O empresario ourensán Jorge Bermello realizou a presentación da nova formación política este martes na cidade. Durante a súa intervención confirmou que o partido se inscribiu para participar nas eleccións municipais, pero que "aínda non está pechado o candidato", que farán público axiña que o concretaron.

O novo grupo político Vivir Ourense está composto por xente que "non vive da política" e que "tampouco fará dela o seu medio de vida". En palabras de Jorge Bermello trátase dunha "organización nada do pobo, con vocación de axudar e servir, sen estar sometida á presión de ningún lobby nin partido político".

Deste xeito, o empresario ourensán referiuse a VOU como "un partido transversal", no que caben "todo tipo de pensamentos" porque consideran que "para que unha cidade funcione non é necesario estar subxugado a unha ideoloxía" e eles "a única" que defenden é "Ourense".

Así mesmo, Jorge Bermello debullou os principais puntos nos que se centrará a mensaxe do partido á sociedade ourensá. A formación quixo situar en primeiro lugar a xente nova. "Vivir Ourense creará unha cidade con oportunidades laborais, cultura e deporte para que os mozos sentan orgullosos de pertencer a ela", explicou.

Tamén se referiron ao segmento de poboación que abarca ás persoas maiores e para eles apuntaron a "a multiplicación por tres do investimento en axuda a domicilio" e a creación dunha cidade "amable e accesible", ao eliminar "as barreiras que poidan presentárselles, cun investimento de 30 millóns de euros en obras no Concello".

CONCILIACIÓN

En terceiro lugar, lanzaron unha mensaxe ás familias con problemas de conciliación, para as que disporán dun "plan específico e de calidade as 24 horas do día para que traballar fóra de casa non supoña un problema para atender ás familias".

Tamén quixeron deixar clara a súa postura de "colaboración absoluta" cos comerciantes, empresarios e emprendedores. Por tanto, afirmaron que atenderán "as súas chamadas, demandas, problemas e necesidades todos os días da semana". Deste xeito, o que buscan é "porllo fácil aos investidores para investir en Ourense".

Outra das súas mensaxes estivo dirixida ao papel que debe desenvolver o Concello de Ourense como "representante da cidadanía e reflexo da sociedade". Por parte de Vivir Ourense apostaron polas "normas de urbanidade como algo básico no pleno", dado que os partidos representan aos cidadáns e a eles débenlle "o máximo respecto".