Asinado un pacto de goberno entre PSOE e Ciudadanos na Cañiza tras 43 anos de mandatos 'populares'
O candidato do PSOE, Luís Piña, tamén secretario de organización do partido na provincia de Pontevedra, valorou o acordo como reflexo do "cambio que querían a maioría dos veciños.
Por E.P. | SANTIAGO DE COMPOSTELA | 13/06/2019 | Actualizada ás 18:26
O candidato do Partido Socialista na Cañiza, Luís Piña, será alcalde na localidade pontevedresa tras chegar a un pacto de goberno co único concelleiro electo de Ciudadanos, tras 43 anos de alcaldías 'populares'. O acordo de gobernabilidade asinouse este xoves, un día despois de que no concello ourensán de Taboadela, o pacto tamén de PSOE e Cs apease ao PP dun goberno local que ostentaba desde 1972.
No caso da Cañiza, as eleccións municipais deixaron ao PP como primeira forza política, cun 45,8% dos sufraxios e 6 edís, pero co mesmo número de concelleiros que os obtidos polo PSOE (6). O empate desfaino así Cidadáns, que obtivo un edil. O acordo anunciado este xoves pecha a etapa de máis de catro décadas de mandatos da formación 'popular', primeiro con César Mera desde 1976 ata 2011 e despois con Miguel Adolfo Domínguez, desde 2011.
O candidato do PSOE, Luís Piña, tamén secretario de organización do partido na provincia de Pontevedra, valorou o acordo como reflexo do "cambio que querían a maioría dos veciños", que optaron tanto polo PSOE como por Ciudadanos e pola cuarta forza, A.C., que non obtivo representación.
"Iniciamos contactos ao principio desta semana, con conversacións bastante intensas e longas, pero demos por concluído esta mañá o pacto". Luís Piña destacou que tras máis de 40 anos de gobernos 'populares', agora asumirá o PSOE o goberno municipal, co que se "culmina o cambio", que tamén "era o compromiso de Cidadáns a nivel municipal".
José Antonio Estévez, concelleiro de Cs, explicou que "Cidadáns aposta polo cambio na Cañiza", "lonxe de intereses persoais e egoístas", cun acordo que "se realiza desde a sensatez para a rexeneración, novos horizontes de progreso e no que prevalecen os intereses xerais do pobo". O edil de Cidadáns insistiu en que haberá un goberno unido e que en poucos meses apreciarase un principio de cambio. "Somos transparentes e vimos sen mochilas, por iso facemos públicos os puntos craves do acordo alcanzado", concluíu.
O acordo co PSOE establece que Estévez será segundo tenente de alcalde e concelleiro de "Innovación e identidade" e inclúe, segundo informou Cs, distintos compromisos para impulsar melloras en ámbitos como a industria ou a sanidade.
"ILÓXICO" PACTO E "TRAIZÓN", SEGUNDO O PP
O secretario xeral do Partido Popular provincial de Pontevedra, José Manuel Cores Tourís, tachou de "ilóxico" o pacto alcanzado entre o PSOE e Ciudadanos. Cores Tourís lembra que "os líderes nacionais de Cidadáns consideraron esta semana ao PP como socio preferente para chegar a acordos". Con todo, fronte a esta postura do partido de Albert Rivera, non se alcanzou un acordo na Cañiza, a pesar da "vontade" do PP de establecer un "pacto estable".
Para os 'populares', isto demostra "unha vez máis" que Ciudadanos "non é un partido de fiar. Ou os seus líderes nacionais non estaban a dicir a verdade cando falaban do PP como socio preferente ou o normal sería que impedisen este pacto difícil de entender, sobre todo vindo dun partido cun líder que fixo da crítica ao PSOE a súa razón de vida".
Os 'populares' explicaron que xa iniciaran conversacións nos últimos días con Cidadáns para alcanzar un pacto de goberno pero, ante a súa "sorpresa", cancelouse a reunión que estaba previsto que mantivesen ambas as formacións. "Terán que explicar con claridade que foi o que levou a Ciudadanos a traizoar unha vez máis os seus propios anuncios", sinalou o secretario xeral do PP provincial.
