Goberno destaca o "golpe" a Resistencia Galega e non descarta novas liñas de investigación

O delegado do Goberno en Galicia, Javier Losada, subliñou o "golpe moi importante" a Resistencia Galega coa detención dos seus "dous máximos dirixentes" e doutras dúas persoas como "colaboradores". Tamén felicitou á Garda Civil polo que cualificou como "brillante operación".

En declaracións aos xornalistas, tras reunirse coa directiva da Asociación de Industriais Metalúrxicos de Galicia, Losada explicou que se tratou dun operativo "liderado desde o servizo de información da Garda Civil en Galicia, coordinado co servizo de información central" da Benemérita.

Sobre un operativo que se desenvolveu nas últimas 72 horas, segundo explicou, o delegado do Goberno precisou que se dá "por terminado" aínda que sen descartar que "poidan aparecer novas liñas de investigación".

En concreto, a Garda Civil detivo en Vigo aos terroristas de Resistencia Galega Antón García Mato, alias 'Toninho', e Asunción Losada Camba, no marco da denominada Operación Lusista.

O PP PIDE EXPLICACIÓNS A ANA PONTÓN

O secretario xeral do PP de Galicia, Miguel Tellado, denunciou a "morneza" da portavoz nacional do BNG, Ana Pontón, ao valorar a detención este sábado de dous integrantes de Resistencia Galega e expresou que "ten que explicar cales son os vínculos ou afectividades" da súa formación co grupo terrorista.

Así se pronunciou o número dous dos populares galegos nunha rolda de prensa despois de que a líder nacionalista, noutra comparecencia ante os medios, expresase a "cautela" coa que ve a detención de Antón García Mato, alias 'Toninho', e Asunción Losada Camba, fuxidos da xustiza desde 2016, porque xa houbo ocasións --dixo-- "nas que houbo persoas que foron inxustamente detidas".

Respecto diso, Tellado pediu a Pontón que teña "esa mesma cautela" ante "outros casos de detencións e investigacións xudiciais". "A súa morneza non mostra moito respecto nin polo Estado de dereito nin pola liberdade e a seguridade das persoas que viven en Galicia", engadiu.

Seguidamente, dixo que a "morneza" da portavoz nacional do Bloque "non a honra para representar ao pobo galego" no Parlamento autonómico e, tras tachar de "tremendamente grave" as manifestacións da nacionalista, apostou por que "explique cales son os vínculos ou afectividades" da súa formación con Resistencia Galega.

Ao ser preguntado sobre se vía vínculos entre o Bloque e o grupo terrorista, o secretario xeral do PPdeG negouno e limitouse a dicir que Ana Pontón "ten que explicar a súa actitude" tan "blandita". "Non denuncio nada do que non poida ter probas", apostilou. E é que, para Tellado, a líder nacionalista "perdeu unha oportunidade de demostrar que simpatías cara ao terrorismo, ningunha".

FUXIDOS DA XUSTIZA DESDE 2006

Fuxidos da Xustiza desde 2006, 'Toninho' e Losada foron detidos este sábado en virtude das requisitorias dos xulgados de instrución 4 e 6 da Audiencia Nacional polos delitos de pertenza a organización terrorista en grao de dirixente, tenencia e transporte de explosivos e falsidade documental.

'Toninho' permanecía fuxido xunto a Losada desde 2006. No momento da súa detención, 'Toninho' e Losada estaban acompañados por Miguel García Nogueiras, considerado como un "colaborador", que tamén foi arrestado. Ademais, a Garda Civil detivo este mesmo domingo a unha cuarta persoa na localidade de Oxén, en Ourense.

Sobre os detidos, Javier Losada confirmou que están nos servizos centrais da Benemérita e que se están "ultimando os últimos trámites das dilixencias" para o seu posterior posta a disposición da Audiencia Naiconal.