Por Europa Press / Redacción | SANTIAGO DE COMPOSTELA | 21/07/2019 | Actualizada ás 18:57
A portavoz nacional do Bloque Nacionalista Galego (BNG), Ana Pontón, recoñeceu que a alternativa ao "Partido Popular de Alberto Núñez Feijóo" pasa "por varios", en referencia a unha alianza entre os grupos progresistas galegos.
Así o sinalou este domingo nunha entrevista na Cadena Ser na que Pontón asegurou que o "maior problema" de Galicia é ver como "o PP condena" a Galicia "catro anos máis" a un "círculo vicioso", no que "se marchan 250.000 persoas, pérdense oportunidades, privatízase a sanidade e non existe unha solución ás baixas pensións e a crise demográfica".
Neste sentido, a líder do BNG considera que o proxecto do PP está "esgotado" despois de dez anos e non descarta que Feijóo adiante as eleccións do 2020 por ese mesmo motivo. Explicou que "non sería a primeira vez" que se produce un adianto das autonómicas, pero no caso de que o presidente da Xunta decida facelo, "terá que xustificarse", porque "se pode aprobar os orzamentos e ten maioría para gobernar", a única razón para adiantar as eleccións é ver "que o seu proxecto está esgotado".
PUBLICIDADE E PROPAGANDA
As críticas do BNG tamén apuntan á "publicidade e propaganda" do Goberno de Feijóo, "que non fai nada" e pretende "solucionalo todo co Xacobeo 2021", mentres que "Galicia desaparece do panorama estatal" e outras comunidades "pon as súas propostas sobre a mesa". Con todo, "ninguén fala de suprimir as peaxes da AP-9, da transferencia da autoestrada, do espolio enerxético ou de Alcoa".
Desde a súa perspectiva, Ana Pontón ten claro que "non hai quen defenda os intereses de Galicia" a nivel estatal, pero que o partido que dirixe está preparado para enfrontarse aos retos e para aproveitar as oportunidades que se presenten. Describe o seu programa como "propio, definido e sólido", que "responde as necesidades" do territorio e que "non vive mirando para Madrid".
"NOVO CICLO POLÍTICO"
Aínda que Pontón aludiu á formación de gobernos en varios concellos galegos, así como ao papel do BNG nas deputacións, a líder do partido quixo trasladar ese bo facer ás próximas eleccións galegas.
Ademais, mostrouse "ilusionada" polo "novo ciclo político" que comezará o ano que vén, cun Bloque que "está a facer ben os deberes", conta con "experiencia" e "unha importante renovación xeracional" e que, en definitiva, "irá a por todas" para "liderar o país". O "empeño", a "capacidade de crecemento do partido" e o sentido da "responsabilidade", serán factores determinantes no próximo encontro electoral.
'GALIZA UN NOVO IMPULSO'
A xuízo da entrevistada, a "mobilización social das rúas" augura un "novo ciclo" no BNG, que ten como lema 'Galiza un novo impulso'. Pontón sinalou que o partido se atopa "á alza", á vista dos resultados dos procesos electorais deste ano, que mostran "os pasos sólidos e firmes" da formación.
Un destes primeiros pasos producirase o 25 de xullo, na manifestación no Parque da Alameda de Santiago, onde "todos os galegos están convidados a reivindicar" os seus dereitos e "máis poder de decisión", xa que Galicia "é un gran país cunha enorme capacidade", que "non pode desenvolver o seu potencial" dentro "do marco e goberno actuais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.