Facer o Camiño para concienciar da doazón de riles

Tres membros de Alcer Alacante (Asociación para la Lucha contra las Enfermedades de Riñón) chegaron a Santiago de Compostela tras 12 días de camiño en bicicleta. Por terceiro ano consecutivo, o seu obxectivo foi visibilizar e concienciar na doazón e transplante de órganos en varios puntos do país.

Na Praza do Obradoiro foron recibidos pola xunta directiva de Alcer Coruña; o alcalde en funcións, Gumersindo Guinarte; a concelleira de Políticas Sociais e Saúde, Mila Castro; a deputada do PP María Antón; o concelleiro de Compostela Aberta Rafael Pena e a concelleira Navia Rivas do BNG.

Un dos membros, Toni Arques, conta que nos 1.200 quilómetros de camiño trasladaron "a problemática da doazón de órganos" a moita xente interesada na causa. Aínda que el non sexa afectado, resalta a necesaria colaboración para "poder dar vida" ás persoas que o necesitan.

Outro membro de Alcer, Vicente Marcos, apelou á colaboración cidadá: "agora non o vas a sufrir, pero cando non esteas podes arranxar dúas vidas". O seu compañeiro e celador da unidade de transplante no hospital de Alacante Miguel Anxo Marcos, confirmouno ao vivir de primeira man "o cambio de vida das persoas trasplantadas".

O coordinador de Alcer Coruña, Alfredo Saborido, afirmou que "aínda que España sexa pioneira e privilexiada en doazón e transplante, as cifras poden baixar, polo que é necesario un banco de órganos e unha sociedade que doe". Ademais, engadiu que hai que facer fincapé en que se cre un "debate social" e fálese con naturalidade sobre o que cada un quere facer ou non cos seus corpos no caso dunha enfermidade grave ou a morte.

Praza do Obradoiro. CEDIDA - Arquivo