Allariz exalta un clásico da gastronomía galega, a empanada
Será os días 17 e 18 de agosto cunha programación na que destacan os deportes e a música.
Por X.M. Fernández | Allariz | 16/08/2019 | Actualizada ás 09:00
O vindeiro sábado 17 de agosto o ‘Disparo de bombas’ anunciará o comezo oficial da “Festa da empanada”. Será ás 9:00 h. horario no que comezará tamén o Campionato de billarda no Campo da Barreira.
Ese mesmo día pola tarde, ás 18:00 h. terá lugar o consolidado Triatlón Vila de Allariz, competición deportiva que chega á súa 30ª edición e que ten a saída na Alameda.
Pola noite, sesión dobre de música: ás 20:30 h. no Campo de Vilanova, da man de “Picadiscos María Faltri”, e ás 24:00 h. nos xardíns do Museo do Coiro a cargo do grupo “Habitación Vudú”.
De cara ao domingo, máis eventos deportivos e máis música ao redor da “Festa Campestre” de exaltación da empanada -dende as 11:00 h.- no Campo de Vilanova, lugar onde haberá postos deste produto durante todo o día.
Para os amantes do deporte, ás 11:00 h. terá lugar a XXX Regata de Piragüismo Festa da Empanada no embarcadoiro da Alameda e ás 18:00 h. o Trofeo de Fútbol no Seixo.
Ás 12:00 h. Desfile de Xigantes e Cabezudos con acompañamento musical do grupo de gaitas De Pé Feito dende a Casa da Cultura ata o Campo de Vilanova, lugar onde ás 13:00 h. se poderá gozar do concerto da Banda Unión Musical de Allariz.
Máis música, de cara á noite, co concerto de Laroá, ás 19:00 h. no Campo de Vilanova, e baile e verbena a cargo da orquestra Grupo D’Moda na Alameda partir das 21:00 h.
