As obras na estación de Ourense afectarán o tráfico ferroviario entre o 4 e 8 de outubro
O proxecto incluirá os novos servizos da Liña de Alta Velocidade Madrid-Galicia, así como traballos relacionados coa posta en servizo do novo enclavamento electrónico de Ourense.
Por E.P. | OURENSE | 02/10/2019 | Actualizada ás 10:57
O tráfico ferroviario entre Galicia e a Meseta con paso pola estación de Ourense verase afectado os días 4 e 8 de outubro polas obras de adaptación aos novos servizos de alta velocidade que se executan na terminal ourensá.
Así o avisou Adif AV, que informou nun comunicado que acometerá durante estes días traballos de infraestrutura, vía, sinalización e catenaria para a nova configuración da praia de vías da estación de Ourense.
Ademais, o proxecto incluirá os novos servizos da Liña de Alta Velocidade Madrid-Galicia, así como traballos relacionados coa posta en servizo do novo enclavamento electrónico de Ourense, concretou Adif.
As obras forman parte do contrato de remodelación de vías e plataformas da estación de Ourense, adxudicado á UTE composta por Ferrovial Agromán e Thales España por 13.695.205,91 euros (IVE incluído).
"O obxectivo final do proxecto é a adaptación da praia de vías e plataformas da estación para que a explotación actual da terminal sexa compatible coa chegada á mesma de trens de alta velocidade en ancho estándar (1.435 mm)", destaca Adif.
