Pontón culpa as forzas políticas estatais de "lastrar" a capacidade do empresariado galego

A portavoz nacional do BNG, Ana Pontón, destacou o "potencial" e a "capacidade" do empresariado galego, e lamentou que esta se ve "lastrada" pola "irrelevancia política" á que están a conducir a economía galega "as forzas estatais". "Un dos principais problemas que ten hoxe Galicia", insistiu.

Ana Pontón mantivo este luns un encontro con empresarios da provincia de Pontevedra xunto á cabeza de lista do BNG para o Congreso pola provincia, Carme da Silva, e o alcalde, Miguel Anxo Fernández Lores.

Nesta reunión, Carme da Silva trasladou o compromiso do BNG de ser unha "forza aliada" que vai "servir" ao tecido empresarial galego "para todas aquelas cuestións que repercutan nas súas posibilidades de crecemento" a través da representación que poida obter no Congreso dos deputados.

Neste sentido, Ana Pontón insistiu en que "Galicia necesita ter voz propia da man do BNG" xa que "os galegos e as galegas perden" cando non están en Madrid.

Por iso, a nova cita electoral do 10 de novembro preséntase como unha "grande oportunidade" para "recuperar peso político" e pór en marcha unha "axenda galega" que supoña "un futuro mellor para este país".

A portavoz do BNG insistiu en "pór o foco" nos problemas e necesidades que teñen o sector naval, as industrias electro intensivas, as infraestruturas, as peaxes da autoestrada, o saneamento das rías, porque "é evidente que esta campaña non vai de Sánchez nin de Casado, esta campaña vai de Galicia", asegurou Pontón.