Por E.P. | VIGO | 09/11/2019 | Actualizada ás 17:32
A Comisión Europea presentou esta semana unha serie de proxectos ao Parlamento Europeo que percibirán financiamento a través do Mecanismo Conectar Europa, onde se inclúen dúas actuacións en Galicia, unha delas na liña ferroviaria que conecta Tui (Pontevedra) con Portugal e outra no Porto Exterior de Ferrol, entre as cales suman axudas de ata 7,8 millóns de euros da Unión Europea (UE).
O Mecanismo Conectar Europa trátase dun instrumento financeiro, creado pola Comisión Europea para desenvolver Redes Transeuropeas de Transporte, Enerxía e Telecomunicacións. Estas redes están cofinanciadas pola Unión Europea e polos estados membros. A axuda financeira da UE serve de catalizador, pero son os estados os que achegan a maior parte dos fondos.
Desta maneira, investiranse máis de 16 millóns de euros en electrificar un tramo transfronteirizo de 6,5 quilómetros da liña ferroviaria que une Vigo co Porto. O proxecto inclúe a electrificación da vía e a modernización dos sistemas de sinalización e seguridade.
“Os cidadáns e as empresas de ambos os países beneficiaranse da mellora do servizo ferroviario a través da fronteira”, subliñou a Comisión Europea. Do total do investimento, que se prevé que estea finalizada en 2023, máis de 6,5 millóns serán pagos por Europa, o que supón un 40% do total.
PORTO DE FERROL
Pola súa banda, en Ferrol o proxecto ten por obxectivo crear un mellor acceso ferroviario ao porto exterior do Porto de Ferrol, no cal se investirán máis de cinco millóns de euros, dos cales case un 25% (1,3 millóns) serán pagos polas administracións comunitarias.
Desta maneira, prevese a creación dunha rede ferroviaria interna planificada no porto exterior e unha terceira liña á estación principal da cidade para así "aumentar a participación da carga transportada por ferrocarril".
Desta maneira, preténdese reducir non só a contaminación, xa que o tren é un dos transportes menos contaminantes, senón tamén a conxestión viaria, porque evitará que estas cargas sexan transportadas por estrada. As obras teñen un prazo de execución de case tres anos, polo que se espera que estean acabadas en xuño de 2022.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.