Por Europa Press / Redacción | SANTIAGO DE COMPOSTELA | 22/11/2019 | Actualizada ás 19:41
O grupo Tanxugueiras lanzou este venres o seu novo disco, 'Contrapunto', no que explora os límites da música tradicional "sen corpiños".
No seu segundo álbum, Sabela Maneiro, Aida Tarrío e Olaia Maneiro reivindican a música "feita desde a tradición pero sen amarres no pasado".
Xa dispoñible nas principais plataformas dixitais para a súa escoita, estará en tendas físicas e á venda en liña a partir do próximo 29 de novembro.
Tamén se poderá adquirir nos concertos do grupo e no Culturgal, en Pontevedra, onde ofrecerán un 'showcase' o vindeiro sábado día 30.
Coproducido por Isaac Palacín, o disco reivindícase no marco dun "novo concepto", o 'trad', un selo característico "entre a tradición e as novas formas de cultura urbana".
Tanxugueiras dará catro concertos iniciais de presentación do seu segundo disco, un por provincia, que comezan o venres 29 en Mos, continúan o 5 de decembro en Celanova, o 14 en Burela e o 2 de febreiro na sala Capitol de Santiago. As entradas están xa á venda na web do grupo (www.tanxugueiras.com) e en www.enterticket.es.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.