Por E.P. | SANTIAGO DE COMPOSTELA | 21/12/2019 | Actualizada ás 18:52
A conselleira do Mar, Rosa Quintana, destacou este sábado a "importancia" de diferenciar os produtos do mar de Galicia a través de marcas e selos de calidade, para que "consigan os prezos que lles corresponden" no mercado.
Así o indicou na presentación do selo gastronómico Km 0 MarGalaica-Ría de Muros Noia, promovido polo grupo de acción local do sector pesqueiro (GALP) Seo de Fisterra Ría de Muros-Noia Costa Sostible, que identifica os restaurantes que ofrecen produtos de mar de Galicia descargados nos portos e lonxas da contorna.
Como sinalou a Xunta nun comunicado, para Rosa Quintana, este proxecto é unha "solución sinxela, pero cun enorme valor ambiental e social". Ademais, a presentación contou cunha degustación previa de produtos de mar en postos da praza de Abastos e cun posterior 'showcooking' no que participaron varios cociñeiros.
O Goberno galego indicou que todos os restaurantes da Ruta dos Faros de Galicia contan con este selo distintivo, que "garante que preparan e identifican aqueles pratos elaborados baixo esta filosofía".
Doutra banda, a conselleira incidiu en que Galicia ten "distintivos" que amparan a calidade dos seus produtos de mar e danlles un "valor engadido", como son a 'Denominación de Orixe Protexida do Mexillón de Galicia' ou o selo de identidade 'pescadeRías, de onde son?'.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.