Ofensiva contra a avespa velutina en Galicia

O vicepresidente da Xunta, Alfonso Rueda, asinou este venres a encomenda á empresa pública Seaga pola cal preto de 80 efectivos comezarán a retirar niños de avespa velutina a próxima semana nas catro provincias.

Este novo sistema, dotado cun investimento de 2,3 millóns de euros, axudará ao control desta praga nos 275 municipios adheridos, no marco do plan de control acordado entre o Goberno galego e a Federación Galega de Municipios e Provincias (Fegamp) a pasada semana.

O obxectivo é ofrecer unha resposta profesional, áxil e homoxénea aos concellos. Para iso, haberá un equipo de intervención con 76 profesionais distribuídos en cinco centros (Santiago, A Coruña, Lugo, Ourense e Pontevedra) en función da evolución do número de avisos. A eles únese un equipo de coordinación de catro persoas.

O persoal de Seaga contará con formación específica para estas actuacións para o tratamento con biocidas. Ademais, os equipos contarán con material e medios necesarios.