Por E.P. | MADRID | 21/01/2020 | Actualizada ás 14:20
O Consello de Ministros aprobou este martes un Real Decreto-lei de medidas urxentes polo que o salario dos empregados públicos subirá un 2% con efectos retroactivos desde o 1 de xaneiro, porcentaxe que cada administración poderá aumentar nun 0,3% cos fondos adicionais e que ademais podería verse incrementado en ata un 1% no caso de que o PIB de 2019 crecese un 2,5%.
En concreto, se o PIB de 2019 superase o 2,1% engadiríase un 0,2% de subida salarial; cun PIB do 2,2% sumaríase un 0,4%; co 2,3% un 0,6%, co 2,4% un 0,8%, e se o crecemento económico fose do 2,5% a subida adicional sería do 1%.
De momento, o que se aprobou este martes é a subida fixa do 2%. A ministra de Política Territorial e Función Pública, Carolina Darias, sinalou na rolda de prensa posterior ao Consello de Ministros que haberá que esperar ao mes de maio para coñecer o dato de PIB de 2019. A previsión do Goberno é un 1,8%, co que non se espera ningunha alza adicional por ese lado.
Darias asegurou que a subida salarial dos empregados públicos era un tema "absolutamente prioritario para o Goberno". "Somos un Goberno que cumpre cos compromisos", dixo a ministra, que lembrou que esta subida salarial afectará a 2,5 millóns de empregados públicos de todos os ámbitos da administración.
Pola súa banda, a portavoz do Goberno e ministra de Facenda, María Jesús Montero, destacou que os empregados públicos son unha "prioridade" porque son "a base do Estado de Benestar e contribúen co seu esforzo persoal á defensa e sostemento dos servizos públicos".
A subida salarial derívase do II Acordo para a mellora do emprego público subscrito polo Goberno de Mariano Rajoy cos principais sindicatos de función pública (CSIF, CC.OO. E UXT) en 2018, e contempla un nivel mínimo de alza do 2,3% (incremento do 2% máis un 0,3% de fondos adicionais). Xunto á equiparación salarial das Forzas e Corpos de Seguridade do Estado, a medida terá un custo de 3.264 millóns de euros.
O acordo contemplaba un incremento do salario de funcionarios do 1,7% para 2018, do 2,25% para 2019 e do 2% para 2020, ao que se podía engadir máis en función do crecemento e fondos adicionais.
En 2019 a subida foi finalmente do 2,5% pola suma adicional dun 0,25%, debido a que o PIB rexistrou un incremento igual ou superior ao 2%, e para este ano, o Executivo xa asume que a subida de funcionarios será do 2,3% (subida fixa do 2% máis 0,3% de fondos adicionais).
QUEIXAS SINDICAIS
Respecto desta suba do salario a funcionarios hai certas seccións sindicais que non se mostran de acordo. Consideran que non se trata dunha subida, senón que é o que lles vén correspondendo aos empregados públicos dende o ano 2010.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.