Quentando motores para a gran Festa da Filloa de Lestedo: gastronomía, tradición e música
Contará coa participación dos Xenerais do Ulla, que realizarán o 1 de marzo "o maior desfile de toda a comarca".
Por E.P. | SANTIAGO DE COMPOSTELA | 07/02/2020 | Actualizada ás 14:33
A 37 Festa da Filloa de Lestedo unirá o 1 de marzo en Boqueixón "o mellor de Galicia", gastronomía, tradición e música, e volverá contar co Gran Desfile dos Xenerais da Ulla.
Así a definiu este venres o delegado territorial da Xunta na provincia da Coruña, Ovidio Rodeiro, durante a presentación desta festa de Intesere Turístico de Galicia na que estivo o alcalde de Boqueixón, Manuel Fernández Munín, e o presidente da Asociación Cultural da Filloa, José Manuel Canabal.
O alcalde de Boqueixón subliñou que o vindeiro xoves 13 de febreiro comezarán "dúas semanas intensas" de actividades para dar a coñecer a 'Festa da Filloa', que empezarán ese día cunha degustación do produto desde as 12.00 ata as 20.00 horas.
Así, Ovidio Rodeiro destacou o "entusiasmo e traballo" da veciñanza de Lestedo, quen "fan posible" que a celebración se convertese "nunha das celebracións gastronómicas máis importantes de Galicia" en época de entroido.
O delegado provincial recalcou tamén a presenza dos xenerais e correos dos Xenerais da Ulla, que realizarán nesta xornada "o maior desfile de toda a comarca" coa participación de máis de 50 persoas.
MÁIS DE 1.500 FILLOAS POR HORA
Como indicou José Manuel Canabal, o día da Festa da Filloa a máquina filloeira e os filloeiros empezarán a traballar ao sete da mañá elaborando máis de 1.500 filloas por hora para a degustación das 12.00 horas.
O presidente da Asociación Cultural da Filloa explicou que a esta mesma hora comezará a parranda do entroido por parte de tres grupos da asociación cultural Mestre Manuel Gacio. As actuacións musicais continuarán ás 18.30 horas da man das orquestras Gran Parada e París de Noia.
Así mesmo, informou de que ás 12.30 horas "varias ducias" de xenerais e correos vestidos con traxes do entroido tradicional realizarán o percorrido por Lestedo.
Os Xenerais da Ulla tamén levarán a cabo ás 18.00 horas os saltos, nos cales falarán de política e temas de actualidade a través de estrofas rimadas e cun "alto grao de sorna, ironía e de bo humor".
Ademais, José Manuel Canabal indicou que a actriz de Boqueixón María Mera realizará a presentación da filloa ás 13.30 horas e dará pé ao pregón do xornalista Pablo Portabales.
