Por E.P. | SANTIAGO DE COMPOSTELA | 12/02/2020 | Actualizada ás 15:01
A Consellería de Educación, Universidade e Formación Profesional convocará este xoves o II Concurso de podcast-Radio na Biblio, que este ano estará dedicado á figura do escritor e filólogo Ricardo Carvalho Calero, protagonista do Día das Letras Galegas.
A convocatoria publicarase o xoves coincidindo co Día Mundial da radio e conta coa a colaboración da CRTVG, e está destinado a centros que formen parten do programa 'Radio na Biblio' ou que traballen con este medio como ferramenta pedagóxica.
As pezas que se presenten ao certame versarán sobre o traballo do autor ferrolán, é dicir, sobre o patrimonio lingüístico galego, especialmente vinculado ao medio xeográfico, cultural e humano máis próximo ao centro e a estimular a lectura de poesía e teatro galegos e neste idioma.
O concurso consta de catro modalidades (Infantil e 1º ciclo de primaria, resto de primaria, ESO e bacharelato, ensinos para adultos e FP) e cada centro poderá presentar un máximo de tres traballos. En total, seleccionaranse dous podcast por modalidade e os gañadores recibirán unha asignación duns 1.000 euros para melloras no laboratorio de radio ou para actividades relacionadas co seu funcionamento, sempre vinculado á biblioteca do centro.
Precisamente, a titular de Educación, Carmen Pomar, visitou esta xornada o CEIP Plurilingüe San Bartolomé, de Vilanova de Arousa, un dos centros que se incorporou este curso ao programa 'Radio na biblio' no que se promove a creación de laboratorios radiofónicos nas bibliotecas escolares.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.