Feijóo: "Non teño ningún interese nin compromiso de pactar con Vox, un partido que está en contra de Galicia"

O presidente da Xunta e candidato do PPdeG á reelección, Alberto Núñez Feijóo, asegurou este xoves que non pactará con Vox, á vez que deu dous argumentos: non cre que ese pacto fose "bo" para os galegos e, "sobre todo", porque non considera que "vaian ter representación parlamentaria" tras as autonómicas do 5 de abril.

Nunha entrevista en 'Los almuerzos de TVE', Feijóo subliñou que Vox "coincide con Podemos e os independentistas" no obxectivo de que el non goberne.

Por iso, proclamou que "ese pacto" (con Vox) non é "posible". "Non teño ningún interese nin compromiso de pactar con Vox e non o farei porque non creo que ese pacto sexa bo para os galegos e, sobre todo, porque non creo que vaia a ter representación parlamentaria", remarcou.

"Non imos darlle categoría a un partido que está en contra de Galicia", aseverou, antes de pór o exemplo do idioma.

"Temos dous idiomas, por que hai que meterse cun? Os nacionalistas fano co español, e os de Vox, co galego. Os galegos falamos cordialmente as dúas linguas", defendeu, e reivindicou unha "educación bilingüe", ademais de chamar a deixar de usar o idioma "como arma arreboladiza".

As palabras de Vox tiveron resposta en redes sociais por parte de varios colectivos e particulares. Entre as voces que se pronunciaron está a do BNG, que lembrou en Twitter que Feijóo "dixo no seu día que para Ourense sería letal ter a Jácome de alcalde. E Jácome é alcalde grazas ao PP de Galicia. Agora vén con 'non teño intención de pactar con Vox', pero se lle fixese falta, xa sabes que faría, verdade?".