Restablecida a circulación na AG-53 en Punxín ao retirarse o camión da Xunta envorcado
Dúas persoas resultaron feridas tras chocar contra o guindastre que participaba no operativo para recoller o tráiler
Por E.P. | OURENSE | 22/02/2020 | Actualizada ás 17:40
O tráfico na AG-53 quedou restablecido en ambos os sentidos ao redor das 14,30 deste sábado despois de que fose retirado o camión promocional da Xunta que envorcou á primeira hora da mañá á altura de Punxín.
En concreto, segundo confirman fontes da Consellería de Cultura e Turismo a Europa Press, tratábase dun tráiler contratado pola Administración autonómica que ía en dirección a Xinzo de Limia para instalar unha 'caseta' publicitaria durante as festas de Entroido.
O sinistro ocorreu mentres este vehículo circulaba pola AG-53 sobre as 7,30 horas da mañá. No punto quilométrico 81, á altura do municipio de Punxín, saíu da vía e finalizou envorcado contra a mediana sen deixar danos persoais.
Segundo informa o 112, foron varios os particulares que sobre esa mesma hora contactaron coa central de emerxencias para alertar do ocorrido. Así, deuse o aviso a Urxencias Sanitarias-061, aos bombeiros do Carballiño e á Garda Civil de Tráfico.
O camión accidentado ardeu parcialmente, segundo contan as testemuñas, e o fume dificultaba a circulación nese tramo da estrada. Ademais, debido aos labores para a retirada do tráiler, os carrís esquerdos en ambos os sentidos permaneceron cortados desde as 8,00 da mañá ata as 14,30 da tarde.
CHOQUE CONTRA O GUINDASTRE
A pesar de que no momento do envorco non houbo que lamentar maiores danos, pasadas as 12,00 do mediodía dúas persoas resultaron feridas graves despois de que os seus respectivos vehículos chocasen contra o guindastre que participaba na retirada do camión.
A central do 112 tivo constancia deste segundo sinistro tras unha chamada de Urxencias Sanitarias-061. Tras este aviso, solicitouse a intervención dos bombeiros do Carballiño para liberar a unha das vítimas, que se quedou atrapada nun dos turismos.
Así mesmo, debido á gravidade das lesións, o 061 mobilizou ata o punto unha aeronave medicalizada con base en Ourense. En total, dúas persoas tiveron que ser trasladadas.
