Fotografían por primeira vez en Galicia un alicerce de luz, un fenómeno fascinante comparable ás auroras boreais

A Sociedade Galega de Historia Natural (SGHN) publicou este luns no seu sitio web as imaxes tomadas o pasado 24 de xaneiro en Muras dun alicerce de luz, "un fenómeno atmosférico de inusual colorido que chamou poderosamente a súa atención, sobre todo polo seu parecido a unha aurora boreal".

As imaxes foron tomadas por membros da SGHN e de Fotografía Ferroltera canso se atopaban en Muras para facer fotografías do ceo nocturno, preto da media noite.

"Eran unha especie de columnas de luz de cores a media altura, entre as que predominaban o azul, o branco e o laranxa", explican.

"Tratábase de alicerces de luz, un fenómeno atmosférico óptico durante o cal estreitas barras de luz parecen estenderse desde o ceo cara ao chan. Non son moi frecuente nas nosas latitudes polas condicións extremas necesarias para que poidan formarse", engaden desde a SGHN.

Os expertos explican que "un alicerce de luz é unha ilusión óptica que se crea cando o frío aire invernal fai que millóns de cristais de xeo planos e hexagonais, balanceándose suavemente dun lado a outro, caian ao chan". Estes cristais, proseguen, "forman un espello xigante, que pode reflectir unha fonte de luz como a iluminación das cidades ou de instalacións industriais, creando a aparencia dunha columna de luz alta e delgada".

Aínda que parece que estes alicerces están radiantes cara ao ceo, en realidade está a suceder o contrario, a luz que viaxa ao espazo reflíctese de regreso ao chan creando a ilusión dun alicerce.

"Que nós saibamos, esta é a primeira vez que un alicerce de luz é fotografado nas nosas latitudes, polo que pensamos que fomos moi afortunados ao poder presentar a todos os galegos este curioso fenómeno  atmosférico", celebran os autores.