Un 'roteiro' audiovisual pola vida de Carvalho Calero no 30 aniversario do seu falecemento

Un percorrido pola biografía de Carvalho Valero. Con motivo do 30 aniversario do falecemento do intelectual ferrolán, homenaxeado este ano no Día das Letras Galegas, o Consello da Cultura propón repasar a traxectoria vital da gran figura do reintegracionismo e unha peza central na engrenaxe da historia literaria de Galicia.

Henrique Rabuñal, estudioso da vida e obra de 'Don Ricardo', asina unha biografía que traza o perfil literario, profesional e humano do profesor ferrolán, desde a represión en tempos do franquismo ata a súa defensa dunha lingua culta e en pié de igualdade co resto de idiomas, que derivou finalmente no seu defensa da reunificación co portugués.

Rabuñal propón, á súa vez, un 'roteiro' polos espazos centrais da vida de Carvalho Calero, desde a súa casa natal en Ferrol ata a estación de tren de Lugo, onde se despediu da súa familia en 1936 para ir a Madrid e onde, seis anos despois, abrazou por primeira vez á súa filla tras quedar cercado na capital pola Guerra.

Todo iso estará acompañado por fotografías de Moncho Rama, do arquivo documental do Consello da Cultura e da Real Academia Galega, e de pezas de audio da Colección O Facho nas que o propio Carvalho traslada a súa opinión sobre o galego e o portugués, Castelao, Otero Pedrayo e outros galeguistas da época.